‘కింగ్‌’ రిలీజ్‌పై క్లారిటీ ఇచ్చిన షారుక్‌ ఖాన్‌..

ఈ ఏడాది సినీ ప్రేక్షకులు ఎంతో ఆసక్తిగా ఎదురుచూస్తున్న చిత్రాల్లో షారుక్‌ ఖాన్‌ నటిస్తున్న ‘కింగ్‌’ ఒకటి. సిద్ధార్థ్‌ ఆనంద్‌ దర్శకత్వంలో తెరకెక్కుతున్న ఈ స్పై యాక్షన్‌ థ్రిల్లర్‌ను డిసెంబర్‌ 24న ప్రేక్షకుల ముందుకు తీసుకురానున్నట్లు చిత్ర బృందం ఇప్పటికే ప్రకటించింది. అయితే ఇటీవల సినిమా విడుదల తేదీ మారొచ్చంటూ సామాజిక మాధ్యమాల్లో వార్తలు వైరల్‌ అయ్యాయి. తాజాగా అభిమానులతో జరిగిన ‘ఆస్క్‌ మీ ఎనీథింగ్‌’ సెషన్‌లో షారుక్‌ ఇచ్చిన సమాధానంతో ఈ ప్రచారానికి తెరపడినట్లు తెలుస్తోంది.

‘మీ కుమారుడు అబ్‌రామ్‌ డూమ్స్‌డే చూస్తాడా? కింగ్‌ చూస్తాడా?’ అని ఓ అభిమాని ప్రశ్నించగా.. ‘తండ్రి నటించిన సినిమానే మొదట చూస్తాడు’ అని షారుక్‌ సమాధానమిచ్చారు. దీంతో ‘కింగ్‌’ డిసెంబర్‌ 24నే విడుదలయ్యే అవకాశం ఉందని అభిమానులు భావిస్తున్నారు. షూటింగ్‌ సమయంలో పలుమార్లు గాయపడ్డానని, దీంతో కొంత విరామం తీసుకుని మళ్లీ షూటింగ్‌ కొనసాగించామని షారుక్‌ తెలిపారు. ప్రస్తుతం అంతా సర్దుకుందని చెప్పారు. దర్శకుడు సిద్ధార్థ్‌ ఆనంద్‌ చాలా కష్టపడుతున్నారని, మరో టీజర్‌ తీసుకురావడానికి కొంత సమయం పడుతుందని పేర్కొన్నారు. ఈ చిత్రంలో షారుక్‌ కుమార్తె సుహానా ఖాన్‌ కూడా నటిస్తోంది. ఈ మూవీని సుమారు రూ.450 కోట్ల భారీ బడ్జెట్‌తో రూపొందిస్తున్నట్లు సమాచారం.