తప్పు మెసేజ్ ఇచ్చే ఐటమ్ సాంగ్స్ చేయను - సిద్ధార్థ్

లవర్ బాయ్‌గా మంచి గుర్తింపు తెచ్చుకున్న నటుడు సిద్ధార్థ్ ప్రస్తుతం ‘ఆపరేషన్ సఫేద్ సాగర్’ వెబ్ సిరీస్ విజయాన్ని ఎంజాయ్ చేస్తున్నారు. నెట్‌ఫ్లిక్స్‌లో స్ట్రీమింగ్ అవుతున్న ఈ సిరీస్‌కు మంచి స్పందన వస్తున్న నేపథ్యంలో, ఐటెమ్ సాంగ్స్‌తో పాటు తన పాత్రల ఎంపికపై సిద్ధార్థ్ చేసిన వ్యాఖ్యలు ఇప్పుడు చర్చనీయాంశంగా మారాయి.

నటుడిగా తనకు కొన్ని సొంత నియమాలు, విలువలు ఉన్నాయని సిద్ధార్థ్ తెలిపారు. సమాజానికి తప్పుడు సందేశం ఇచ్చే ఐటెమ్ పాటల్లో తాను ఎప్పటికీ నటించనని స్పష్టం చేశారు. ముఖ్యంగా ఓ మహిళ చుట్టూ పెద్ద సంఖ్యలో పురుషులు అసభ్యంగా ప్రవర్తించేలా చూపించే పాటల్లో నటించడం తన విధానం కాదని అన్నారు. అలాంటి సంస్కృతిని ప్రోత్సహించడం తనకు ఇష్టం లేదని పేర్కొన్నారు.

అలాగే తాను కేవలం హీరో పాత్రలకే పరిమితం కావాలని అనుకోవడం లేదని సిద్ధార్థ్ వెల్లడించారు. హీరో పాత్రలోనే తీవ్రమైన ప్రతికూల లక్షణాలు ఉంటే అలాంటి కథలను అంగీకరించనని చెప్పారు. అయితే కథ డిమాండ్ చేస్తే చివరికి నాశనమయ్యే క్రూరమైన విలన్ పాత్రలోనైనా నటించేందుకు సిద్ధంగా ఉన్నానని తెలిపారు. నటుడిగా సమాజానికి మంచి సందేశం ఇవ్వడం తనకు ముఖ్యమని సిద్ధార్థ్ స్పష్టం చేశారు.