తండ్రుల సినీ వారసత్వాన్ని ముందుకు తీసుకెళ్తున్న స్టార్‌ డాటర్స్‌

టాలీవుడ్‌లో సినీ వారసత్వం అనగానే సాధారణంగా హీరోలుగా అడుగుపెట్టే కుమారులే గుర్తుకొస్తారు. అయితే ఇప్పుడు స్టార్‌ హీరోల కుమార్తెలు కూడా తమదైన శైలిలో సినీ పరిశ్రమలో ప్రత్యేక గుర్తింపు పొందుతున్నారు. కొందరు కథానాయికలుగా వెండితెరకు పరిచయం అవుతుండగా, మరికొందరు తెరవెనుక ఉంటూ తండ్రుల కెరీర్‌కు అండగా నిలుస్తున్నారు. నందమూరి బాలకృష్ణ చిన్న కుమార్తె తేజస్విని ఇందుకు ఉదాహరణగా నిలుస్తున్నారు. ‘అఖండ’ తర్వాత బాలకృష్ణ సినిమాల ఎంపిక, కొత్త రూపం, తదుపరి చిత్రాల ప్రణాళికలో ఆమె కీలక పాత్ర పోషిస్తున్నట్లు సినీ వర్గాల్లో చర్చ జరుగుతోంది. ఆమె కూడా త్వరలో సినీ రంగంలోకి అడుగుపెట్టనున్నారనే వార్తలు వినిపిస్తున్నప్పటికీ, దీనిపై అధికారిక ప్రకటన వెలువడాల్సి ఉంది.

మరోవైపు, సీనియర్ నటుడు శ్రీకాంత్‌, ఊహ దంపతుల కుమార్తె మేధ కథానాయికగా పరిచయం కానుండటం ఆసక్తి రేకెత్తిస్తోంది. మైత్రీ మూవీ మేకర్స్‌ నిర్మిస్తున్న ప్రేమకథా చిత్రంతో ఆమె సినీ రంగ ప్రవేశం చేయనున్నారు. ఈ చిత్రంలో జై జాస్తి కథానాయకుడిగా పరిచయం కానున్నారు. మెగాస్టార్ చిరంజీవి పెద్ద కుమార్తె సుస్మిత కొణిదెల తండ్రి చిత్రాలకు వస్త్రాల రూపకల్పన చేయడంతో పాటు నిర్మాతగానూ రాణిస్తున్నారు. అలాగే, రవితేజ కుమార్తె మోక్షద కూడా తండ్రి సినిమా కార్యక్రమాల్లో చురుగ్గా పాల్గొంటున్నారు. ఆయన కథల ఎంపికలోనూ ఆమె సలహాలు ఇస్తున్నట్లు సమాచారం. ఇలా స్టార్‌ హీరోల కుమార్తెలు తెరపై, తెరవెనుక తమదైన పాత్ర పోషిస్తూ టాలీవుడ్‌లో చర్చనీయాంశంగా మారుతున్నారు.