తెలంగాణ యాస ఉంటే చాలదు.. కంటెంట్ కావాలి..!

తెలంగాణ నేటివిటీతో సినిమాలు తీస్తే ప్రేక్షకులు ఆదరిస్తారనే నమ్మకం టాలీవుడ్‌లో బలంగా ఉంది. అయితే యాస, పల్లెటూరి వాతావరణం మాత్రమే విజయాన్ని అందించలేవని గత చిత్రాలు నిరూపించాయి. 'బలగం', 'దసరా', 'టిల్లు స్క్వేర్' సినిమాలు భారీ విజయాలు సాధించగా.. 'పరేషాన్', 'పొట్టేల్', 'రజాకార్', 'మారెమ్మ' ఆశించిన ఫలితాలను అందుకోలేకపోయాయి. 'రాజు వెడ్స్ రాంబాయి' కూడా తక్కువ బడ్జెట్‌తో మంచి వసూళ్లు సాధించింది. మరోవైపు 'దండోరా' కంటెంట్ పరంగా ప్రశంసలు అందుకున్నా థియేటర్లలో నిరాశపరిచింది. ఈ ఫలితాలను పరిశీలిస్తే తెలంగాణ నేటివిటీ ఒక్కటే హిట్‌కు గ్యారెంటీ కాదని స్పష్టమవుతోంది. ఇప్పుడు శర్వానంద్ నటిస్తున్న 'భోగి', ప్రియదర్శి ప్రధాన పాత్రలో వస్తున్న 'ఇడుపు కాయితం'పై ఆసక్తి నెలకొంది. ఒకటి పీరియడ్ మాస్ యాక్షన్ కథ కాగా, మరొకటి గ్రామీణ నేపథ్యంలోని ఫ్యామిలీ డ్రామా. మరి ఈ రెండు సినిమాలు బాక్సాఫీస్ దగ్గర ఎలాంటి ఫలితాలు అందుకుంటాయో చూడాలి. మొత్తానికి తెలంగాణ యాస ప్రేక్షకులను ఆకట్టుకోవచ్చు.. కానీ విజయాన్ని నిర్ణయించేది మాత్రం బలమైన కథ, భావోద్వేగాలు, వినోదమే!