నేడు, రేపు గుజరాత్‌లో ప్రధాని మోదీ పర్యటన..

ప్రధాని నరేంద్ర మోదీ నేడు, రేపు గుజరాత్‌లో పర్యటించనున్నారు. ఈ పర్యటనలో భాగంగా బనస్కాంతలో సుమారు రూ.14 వేల కోట్ల విలువైన అభివృద్ధి ప్రాజెక్టులకు శ్రీకారం చుట్టనున్నారు. అలాగే పీఎం కిసాన్ పథకం కింద రైతులకు అందించే రూ.19 వేల కోట్ల నిధులను విడుదల చేయనున్నారు. పశుసంపద అభివృద్ధికి సంబంధించిన భారత్ బోవైన్ బ్రీడింగ్ కేంద్రాన్ని జాతికి అంకితం చేయనున్నారు. ఈ కార్యక్రమాలతో వ్యవసాయం, పశుసంవర్ధక రంగాలకు ప్రోత్సాహం అందించడమే లక్ష్యంగా కార్యక్రమాలు చేపట్టనున్నారు.

మరోవైపు అహ్మదాబాద్ మెట్రో రైలు విస్తరణ పనులకు ప్రధాని శంకుస్థాపన చేయనున్నారు. ఏక్తానగర్‌లో భారత్ పర్వ్ 2026ను ప్రారంభించడంతో పాటు, అక్కడ సుమారు రూ.400 కోట్ల విలువైన అభివృద్ధి ప్రాజెక్టులకు శ్రీకారం చుట్టనున్నారు. సర్దార్ వల్లభ్‌భాయ్ పటేల్ 151వ జయంతి వేడుకల్లో కూడా పాల్గొననున్నారు. రెండు రోజుల పర్యటనలో భాగంగా మౌలిక సదుపాయాలు, వ్యవసాయం, పశుసంవర్ధక రంగాలు, పర్యాటక అభివృద్ధికి సంబంధించిన పలు కార్యక్రమాల్లో ప్రధాని పాల్గొననున్నారు.