బెంగళూరులో గ్రాండ్‌గా 'టాక్సిక్' ట్రైలర్ లాంచ్..

రాకింగ్ స్టార్ యశ్ హీరోగా తెరకెక్కుతున్న 'టాక్సిక్: ఎ ఫెయిరీటేల్ ఫర్ గ్రోన్‌అప్స్' చిత్రం నుంచి మరో భారీ అప్‌డేట్ వచ్చింది. ఈ సినిమా ట్రైలర్‌ను ఆగస్టు 8న బెంగళూరులో అత్యంత వైభవంగా విడుదల చేయాలని చిత్రబృందం సన్నాహాలు చేస్తోంది. ట్రైలర్ లాంచ్‌కు ముందు దర్శకురాలు గీతూ మోహన్‌దాస్ ప్రత్యేక మీడియా సమావేశంలో పాల్గొని సినిమా విశేషాలను పంచుకోనున్నారు. యశ్‌తో పాటు చిత్రంలోని ఐదుగురు కథానాయికలు కూడా ఈ వేడుకలో పాల్గొనే అవకాశం ఉంది. దేశవ్యాప్తంగా సినీ అభిమానుల దృష్టిని ఆకర్షించేలా ఈ ఈవెంట్‌ను భారీ స్థాయిలో నిర్వహించేందుకు మేకర్స్ సిద్ధమవుతున్నారు.

కన్నడ, ఇంగ్లిష్ భాషల్లో ఏకకాలంలో చిత్రీకరించిన 'టాక్సిక్' చిత్రాన్ని 40కిపైగా భాషల్లో డబ్ చేసి ప్రపంచవ్యాప్తంగా ఆగస్టు 26న విడుదల చేయనున్నారు. ఇప్పటికే విడుదలైన గ్లింప్స్, టీజర్, పాటలు మంచి స్పందన పొందగా, ట్రైలర్‌తో సినిమాపై అంచనాలను మరింత పెంచాలని చిత్రబృందం భావిస్తోంది. ఈ సినిమా బలమైన భావోద్వేగాలతో కూడిన కథ అని యశ్ తెలిపారు. హాలీవుడ్ స్టంట్ కొరియోగ్రాఫర్ జే.జే. పెర్రీ రూపొందించిన యాక్షన్ సన్నివేశాలు సినిమాకు ప్రత్యేక ఆకర్షణగా నిలుస్తాయని చెప్పారు. ఈ చిత్రంలో తారా సుతారియా, నయనతార, రుక్మిణి వసంత్, కియారా అడ్వాణీ, హ్యూమా ఖురేషీ కీలక పాత్రల్లో నటిస్తున్నారు.