హాలీవుడ్‌లో విజయ్ సేతుపతి ‘మహారాజ’ రీమేక్

మక్కల్ సెల్వన్ విజయ్ సేతుపతి కథానాయకుడిగా నటించిన తమిళ క్రైమ్ థ్రిల్లర్ ‘మహారాజ’ అంతర్జాతీయ స్థాయిలో మరో అరుదైన ఘనతను సొంతం చేసుకుంది. 2024లో విడుదలై ప్రేక్షకుల ప్రశంసలు అందుకున్న ఈ చిత్రాన్ని హాలీవుడ్‌లో రీమేక్ చేసేందుకు ప్రయత్నాలు జరుగుతున్నాయి. ఓ ప్రముఖ హాలీవుడ్ ఏజెన్సీ రీమేక్ హక్కుల కోసం తమను సంప్రదించినట్లు నిర్మాత సుధన్ సుందరం వెల్లడించారు. చైనాలోనూ ఈ సినిమా భారీ ఆదరణ అందుకుని సుమారు రూ.91.65 కోట్ల వసూళ్లు సాధించడంతో పాటు, ఓటీటీ వేదికలపై కూడా మంచి స్పందనను దక్కించుకుంది. దీంతో హాలీవుడ్ దృష్టిని ఆకర్షించినట్లు నిర్మాత తెలిపారు.

హాలీవుడ్ రీమేక్‌ను ఓ స్టార్ హీరోతో తెరకెక్కించేందుకు ఏజెన్సీ ప్రయత్నాలు చేస్తోందని, వచ్చే ఏడాది చిత్రీకరణ ప్రారంభమయ్యే అవకాశం ఉందని సుధన్ సుందరం పేర్కొన్నారు. ప్రస్తుతం కథానాయకుడి పాత్ర కోసం హాలీవుడ్ నటుడు మాథ్యూ మెక్‌కోనహే పేరు సోషల్ మీడియాలో వినిపిస్తోంది. అయితే నటీనటులు, నిర్మాణ సంస్థ తదితర వివరాలను సంబంధిత ఏజెన్సీ అధికారికంగా ప్రకటించాల్సి ఉంది. నిథిలన్ స్వామినాథన్ దర్శకత్వం వహించిన ‘మహారాజ’లో తన ఇంట్లో ‘లక్ష్మి’ అనే డస్ట్‌బిన్ కనిపించడం లేదంటూ ఓ బార్బర్ పోలీసులకు ఫిర్యాదు చేయడంతో కథ మొదలవుతుంది. అనురాగ్ కశ్యప్ ప్రతినాయకుడిగా నటించగా, సేతుపతి కుమార్తె పాత్రలో నటించిన సంచన నమిదాస్‌కు ఉత్తమ సహాయ నటిగా జాతీయ అవార్డు లభించింది.