5 వేల ఏళ్ల క్రితమే భారత్‌లో ఫ్లయింగ్ వెహికల్- రణ్‌బీర్ కపూర్

భారతీయ పురాణాల్లో పుష్పక విమానం అత్యంత అద్భుతమైన అంశాల్లో ఒకటని బాలీవుడ్ నటుడు రణ్‌బీర్ కపూర్ అన్నారు. తన తాజా చిత్రం ‘రామాయణం’ ప్రమోషన్లలో భాగంగా నిర్వహించిన కార్యక్రమంలో ఆయన ఈ వ్యాఖ్యలు చేశారు. ప్రముఖ వ్యాపారవేత్త ఎలాన్ మస్క్‌కు చెందిన టెస్లా సంస్థ ఇటీవల ఫ్లయింగ్ కారును ఆవిష్కరించడంపై స్పందిస్తూ.. భారత్‌లో 5 వేల ఏళ్ల క్రితమే అలాంటి వాహనం ఉందని పేర్కొన్నారు. రామాయణంలో ప్రస్తావించిన పుష్పక విమానాన్ని ఉద్దేశించే రణ్‌బీర్ ఈ వ్యాఖ్యలు చేశారు. కాగా, అక్టోబర్ 15న టెస్లా తన కొత్త రోడ్‌స్టర్ కారును ప్రదర్శించగా, 2028 నాటికి దాని ఉత్పత్తిని ప్రారంభించాలని లక్ష్యంగా పెట్టుకుంది.

ఇదే కార్యక్రమంలో శ్రీరాముడి పాత్రలో నటించడం తనకు జీవితంలో ఒక్కసారి మాత్రమే లభించే గొప్ప అవకాశమని రణ్‌బీర్ అభివర్ణించారు. రాముడిలోని సోదరుడు, భర్త, తండ్రి, స్నేహితుడు వంటి విభిన్న వ్యక్తిత్వ కోణాల గురించి మాట్లాడారు. రావణుడి పాత్రలో కనిపించనున్న యశ్ కూడా రామాయణంలోని విభిన్న కథనాలు, వాటిని ప్రజలు అర్థం చేసుకునే విధానాలపై తన అభిప్రాయాలను పంచుకున్నారు. నితేశ్ తివారీ దర్శకత్వంలో రెండు భాగాలుగా తెరకెక్కుతున్న ఈ చిత్రంలో రణ్‌బీర్ కపూర్ శ్రీరాముడిగా, సాయిపల్లవి సీతగా, యశ్ రావణుడిగా నటిస్తున్నారు. తొలి భాగం నవంబర్ 5న ప్రపంచవ్యాప్తంగా విడుదల కానుంది.