నేటి నుంచి ప్రపంచ షూటింగ్ ఛాంపియన్‌షిప్.. బరిలో మను బాకర్, ఇషా సింగ్, ఇలవేనిల్

ప్రపంచ షూటింగ్ ఛాంపియన్‌షిప్ ఆదివారం నుంచి ప్రారంభం కానుంది. ఇటీవల జపాన్‌లో జరిగిన ఆసియా క్రీడల్లో భారత షూటింగ్ బృందం ఆశించిన స్థాయిలో రాణించలేకపోయింది. గత ఆసియా క్రీడల్లో సాధించిన పతకాలతో పోలిస్తే ఈసారి భారత షూటర్ల ప్రదర్శన నిరాశపరిచింది. ఈ నేపథ్యంలో ప్రపంచ ఛాంపియన్‌షిప్ భారత షూటర్లకు కీలక సవాల్‌గా మారింది. ముఖ్యంగా ఆసియా క్రీడల్లో ఆశించిన ఫలితాలు సాధించలేకపోయిన డబుల్ ఒలింపిక్ పతక విజేత మను బాకర్ ప్రదర్శనపై ఆసక్తి నెలకొంది. హైదరాబాద్ స్టార్ ఇషా సింగ్, జపాన్‌లో మెరుగైన ప్రదర్శన చేసిన ఇలవేనిల్ వలరివన్ కూడా భారత జట్టు తరఫున పోటీపడనున్నారు. మను 10 మీటర్ల, 25 మీటర్ల పిస్టల్ విభాగాల్లో, ఇషా 25 మీటర్ల పిస్టల్‌లో, ఇలవేనిల్ 10 మీటర్ల ఎయిర్ రైఫిల్ విభాగంలో తమ అదృష్టాన్ని పరీక్షించుకోనున్నారు.

ఈ ప్రపంచ ఛాంపియన్‌షిప్ 2028 లాస్ ఏంజెలెస్ ఒలింపిక్స్‌కు అర్హత సాధించే టోర్నీగా కూడా ప్రాధాన్యం సంతరించుకుంది. మొత్తం 12 వ్యక్తిగత ఈవెంట్లలో 36 కోటా స్థానాలు అందుబాటులో ఉన్నాయి. వీలైనన్ని ఎక్కువ ఒలింపిక్ కోటా స్థానాలు సాధించి, మెగా క్రీడలకు సిద్ధమయ్యేందుకు తగిన సమయం పొందాలని భారత షూటర్లు లక్ష్యంగా పెట్టుకున్నారు. ఆసియా క్రీడల్లో రెండు స్వర్ణాలు, ఒక రజతం సాధించిన నీరూ దాండా మహిళల ట్రాప్ విభాగంలో ప్రధాన ఆకర్షణగా నిలవనుంది. పురుషుల విభాగంలో 10 మీటర్ల ఎయిర్ రైఫిల్‌లో పార్థ్ మానే, 50 మీటర్ల రైఫిల్ త్రీ పొజిషన్స్‌లో ఐశ్వరీ ప్రతాప్ సింగ్ తోమర్, స్కీట్ విభాగంలో మైరాజ్ అహ్మద్ ఖాన్, అనంత్‌జీత్ సింగ్ నరూకా పతకాలపై ఆశలు రేకెత్తిస్తున్నారు.