కామన్వెల్త్ కబడ్డీలో భారత్ డబుల్ ధమాకా..

కబడ్డీలో భారత జట్లు మరోసారి తమ ఆధిపత్యాన్ని చాటుకున్నాయి. తొలి కామన్వెల్త్ కబడ్డీ టోర్నీలో పురుషులు, మహిళల విభాగాల్లో విజేతలుగా నిలిచి డబుల్ టైటిల్ సాధించాయి. శనివారం జరిగిన మహిళల ఫైనల్లో భారత్ 35-15తో ఉగాండాపై ఘన విజయం సాధించింది. మ్యాచ్ ప్రారంభం నుంచే ఆధిపత్యం ప్రదర్శించిన భారత జట్టు తొలి పది నిమిషాల్లో 7-3తో ఆధిక్యంలోకి వెళ్లింది. ఆ తర్వాత స్కోరును 15-4కు చేర్చి ప్రత్యర్థిపై ఒత్తిడి పెంచింది. చివరి వరకు అదే జోరు కొనసాగించి టైటిల్‌ను కైవసం చేసుకుంది. రైడింగ్‌లో సాక్షి 10, అను 6, నిధి శర్మ 5 పాయింట్లతో రాణించగా.. ట్యాక్లింగ్‌లో రితు, సుమన్ చెరో నాలుగు పాయింట్లు సాధించి జట్టు విజయంలో కీలక పాత్ర పోషించారు.

ఇక పురుషుల విభాగం ఫైనల్లోనూ భారత జట్టు అద్భుత ప్రదర్శన చేసింది. శ్రీలంకను 54-17తో చిత్తు చేసి మరో టైటిల్‌ను సొంతం చేసుకుంది. ఆరంభం నుంచే దూకుడుగా ఆడిన భారత్ తొలి పది నిమిషాల తర్వాత 15-7తో ఆధిక్యంలో నిలిచింది. అనంతరం ప్రత్యర్థికి ఏమాత్రం అవకాశం ఇవ్వకుండా స్కోరు అంతరాన్ని పెంచుకుంటూ 21-9తో విజయానికి చేరువైంది. చివరి వరకు ఆధిపత్యాన్ని కొనసాగించి భారీ తేడాతో గెలిచింది. దీంతో తొలి కామన్వెల్త్ కబడ్డీ టోర్నీలో పురుషులు, మహిళలు రెండు విభాగాల్లోనూ భారత్ ఛాంపియన్‌గా నిలిచి చరిత్ర సృష్టించింది.