ఓటీటీలోనూ దూసుకెళ్తున్న బెత్లెహమ్ కుటుంబం.. మరో రికార్డు సొంతం!

ఇటీవల విడుదలై బాక్సాఫీస్ వద్ద రూ.300 కోట్లకు పైగా వసూళ్లు సాధించిన మలయాళ రొమాంటిక్ ఎంటర్‌టైనర్ బెత్లెహమ్ కుటుంబం ఇప్పుడు ఓటీటీలోనూ సత్తా చాటుతోంది. మమితా బైజు, నివిన్ పౌలి జంటగా నటించిన ఈ సినిమా ప్రస్తుతం జియో హాట్‌స్టార్‌లో స్ట్రీమింగ్ అవుతోంది. తొలి వీకెండ్‌లోనే ఈ చిత్రానికి ఓటీటీ ప్రేక్షకుల నుంచి భారీ స్పందన లభించింది.

అక్టోబర్ 2 నుంచి 4 వరకు జియో హాట్‌స్టార్‌లో అత్యధిక మంది వీక్షించిన నాన్-హిందీ చిత్రంగా బెత్లెహమ్ కుటుంబం నిలిచినట్లు ఆర్మాక్స్ మీడియా వెల్లడించింది. ఈ సినిమాను ఏకంగా 54 లక్షల మంది వీక్షించినట్లు తెలిపింది. గిరీశ్ ఏడీ దర్శకత్వం వహించిన ఈ చిత్రాన్ని ఫహాద్ ఫాజిల్, దిలీష్ పోతాన్, శ్యామ్ పుష్కరన్ నిర్మించారు. సెప్టెంబర్ 4న థియేటర్లలో విడుదలైన ఈ చిత్రం ప్రస్తుతం జియో హాట్‌స్టార్‌లో మలయాళం, తెలుగు, తమిళం, కన్నడ, హిందీ భాషల్లో అందుబాటులో ఉంది.