ఏడు నెలల తర్వాత ఓటీటీలోకి 'మత్తురా' మూవీ!

ఓటీటీ వేదికల్లో ప్రతి వారం కొత్త సినిమాలు విడుదలవుతూనే ఉంటాయి. ఈ వారం కూడా కొన్ని తెలుగు చిత్రాలు, డబ్బింగ్ సినిమాలు ప్రేక్షకుల ముందుకు వస్తున్నాయి. అయితే ఇవన్నింటి మధ్య ఒక చిన్న తెలుగు సినిమా ఎలాంటి హడావుడి లేకుండా నిశ్శబ్దంగా ఓటీటీలోకి వచ్చేసింది. ఈ సినిమా థియేటర్లలో విడుదలైన విషయం కూడా చాలామందికి తెలియకపోవచ్చు.

అనుదీప్, అజయ్ కుమార్, వేద్విక తదితరులు నటించిన ‘మత్తురా’ సినిమా గత సంవత్సరం సెప్టెంబర్ 19న థియేటర్లలో విడుదలైంది. తక్కువ బడ్జెట్, కొత్త నటీనటులు ఉండటం వల్ల ఈ సినిమా పెద్దగా గుర్తింపు పొందలేదు. ఇప్పుడు ఏడు నెలల తర్వాత ఈ చిత్రం ఓటీటీలోకి వచ్చింది. ప్రస్తుతం ఇది అమెజాన్ ప్రైమ్ వీడియోలో అద్దె విధానంలో అందుబాటులో ఉంది.

ఈ సినిమా కథ నలుగురు స్నేహితుల జీవితాల చుట్టూ తిరుగుతుంది. మద్యం అలవాటు వారి జీవితాలపై ఎలా ప్రభావం చూపింది, వారిని ఎలాంటి ప్రమాదకర పరిస్థితుల్లోకి నెట్టింది అనే అంశాలతో కథ సాగుతుంది. అడ్వెంచర్ డ్రామాగా తెరకెక్కిన ఈ చిత్రానికి పువ్వాళ చలపతి దర్శకత్వం వహించారు.