హైదరాబాద్‌కు అమిత్ షా.. బీజేపీ మహా పాదయాత్రకు హాజరు

కేంద్ర హోంమంత్రి అమిత్ షా హైదరాబాద్ పర్యటనకు రానున్నారు. ఈ పర్యటనను బీజేపీ ప్రతిష్టాత్మకంగా తీసుకుంది. ‘ప్రజాస్వామ్యాన్ని రక్షిద్దాం – అరాచకతను అంతం చేద్దాం’ అనే నినాదంతో భారీ మహా పాదయాత్రకు పార్టీ ఏర్పాట్లు చేస్తోంది. దేశవ్యాప్తంగా విపక్షాల ఇండియా కూటమి నిర్వహిస్తున్న ప్రచారానికి రాజకీయంగా కౌంటర్ ఇచ్చే లక్ష్యంతో హైదరాబాద్‌లో ఈ కార్యక్రమాన్ని చేపడుతున్నట్లు సమాచారం.

ప్రకటించిన షెడ్యూల్ ప్రకారం, మధ్యాహ్నం 1 గంటకు అమిత్ షా హైదరాబాద్‌కు చేరుకోనున్నారు. అనంతరం భాగ్యలక్ష్మి అమ్మవారి ఆలయంలో ప్రత్యేక పూజలు నిర్వహించనున్నారు. సాయంత్రం 4 గంటలకు బాబూ జగ్జీవన్ రామ్ విగ్రహం నుంచి మహా పాదయాత్ర ప్రారంభం కానుంది. పర్యటనలో భాగంగా సినీ, మీడియా రంగాలకు చెందిన ప్రముఖులతో అమిత్ షా భేటీ అయ్యే అవకాశం కూడా ఉన్నట్లు తెలుస్తోంది.