మహారాష్ట్ర UCCపై అసదుద్దీన్ ఒవైసీ తీవ్ర విమర్శలు..

మహారాష్ట్రలో ఉమ్మడి పౌర స్మృతి (UCC) అమలుకు ప్రభుత్వం చేస్తున్న ప్రయత్నాలపై AIMIM అధ్యక్షుడు అసదుద్దీన్ ఒవైసీ తీవ్ర విమర్శలు చేశారు. ప్రతిపాదిత విధానం ఉమ్మడి పౌర స్మృతి కాదని, అది కేవలం హిందూ సివిల్ కోడ్‌లా ఉందని ఆయన ఆరోపించారు. BJP పాలిత రాష్ట్రాల్లో మాదిరిగానే మహారాష్ట్రలోనూ మైనారిటీలను లక్ష్యంగా చేసుకునే ప్రయత్నం జరుగుతోందని విమర్శించారు. ప్రభుత్వం రూపొందించిన ప్రశ్నావళిలో బహుభార్యాత్వం వంటి అంశాలను ప్రస్తావించినప్పటికీ, హిందూ అన్‌డివైడెడ్ ఫ్యామిలీ (HUF) గురించి ఎలాంటి ప్రస్తావన లేదని ఆయన ప్రశ్నించారు.

UCC రూపకల్పన ప్రక్రియలో మైనారిటీలకు తగిన ప్రాతినిధ్యం కల్పించకపోవడంపై కూడా ఒవైసీ అభ్యంతరం వ్యక్తం చేశారు. ఈ కారణంగానే రిటైర్డ్ న్యాయమూర్తి ఆర్.సి. చవాన్ రాజీనామా చేశారని ఆయన పేర్కొన్నారు. వివిధ మతాలు, వర్గాలకు చెందిన ప్రజల అభిప్రాయాలకు తగిన ప్రాధాన్యం ఇవ్వకుండా UCCపై ముందుకు వెళ్లడం సరికాదనే అభిప్రాయాన్ని ఆయన వ్యక్తం చేశారు. ఒవైసీ వ్యాఖ్యలతో మహారాష్ట్రలో ప్రతిపాదిత ఉమ్మడి పౌర స్మృతిపై రాజకీయ చర్చ మరోసారి వేడెక్కింది.