జగన్ పర్యటనతో విశాఖలో హడావిడి

మాజీ సీఎం వైఎస్ జగన్ మోహన్ రెడ్డి విశాఖపట్నం పర్యటన సందర్భంగా వైకాపా శ్రేణుల అత్యుత్సాహం నగరవాసులకు తీవ్ర ఇబ్బందులు కలిగించింది. ఆయన రాకపోకల సమయంలో విమానాశ్రయానికి భారీగా చేరుకున్న కార్యకర్తలు హడావుడి సృష్టించారు. ఎయిర్‌పోర్టు నుంచి జబ్బారుతోటకు కాన్వాయ్ వెళ్లే మార్గంలో రెండు గంటల పాటు దుకాణాలు మూసివేయబడ్డాయి. ట్రాఫిక్ పూర్తిగా స్తంభించి వాహనదారులు తీవ్ర ఇబ్బందులు పడ్డారు. మార్గమంతా వివిధ నినాదాలతో పోస్టర్లు ఏర్పాటు చేశారు.

బాధితులను పరామర్శించకముందే ఏఐ సాంకేతికతతో జగన్ ఓదారుస్తున్నట్లు ఫ్లెక్సీలు ఏర్పాటు చేశారు. మీడియాతో మాట్లాడుతున్న సమయంలో కార్యకర్తలు వివిధ నినాదాలు చేశారు. విమానాశ్రయంలో అధికారులు కొన్ని వాహనాలను అడ్డుకోవడంతో కార్యకర్తలు పోలీసులతో వాగ్వాదానికి దిగారు, తోపులాటలో భద్రతా గ్రిల్స్ దెబ్బతిన్నాయి. శాసనమండలిలో ప్రతిపక్ష నేత బొత్స సత్యనారాయణ అనుచరులను కూడా పోలీసులు అడ్డుకోవడంతో ఉద్రిక్త పరిస్థితులు నెలకొన్నాయి.