ఎమ్మెల్యే అరికెపూడి గాంధీకి ఈడీ నోటీసులు

సాహితీ ఇన్‌ఫ్రాటెక్‌ వెంచర్స్‌ ఇండియా ప్రైవేట్‌ లిమిటెడ్‌కు సంబంధించిన మనీలాండరింగ్‌ కేసులో శేరిలింగంపల్లి ఎమ్మెల్యే అరికెపూడి గాంధీకి ఎన్‌ఫోర్స్‌మెంట్‌ డైరెక్టరేట్‌ (ఈడీ) సమన్లు జారీ చేసింది. గురువారం నోటీసులు అందజేసిన ఈడీ అధికారులు, సెప్టెంబర్‌ 27న విచారణకు హాజరుకావాలని ఆదేశించినట్లు సమాచారం. ఎమ్మెల్యే బ్యాంకు ఖాతాల ద్వారా సాహితీ ఇన్‌ఫ్రా నుంచి రూ.2.1 కోట్ల నిధులు మళ్లించారనే ఆరోపణలపై ఈడీ వివరాలు ఆరా తీస్తున్నట్లు తెలుస్తోంది.

సాహితీ ఇన్‌ఫ్రా ప్రీ-లాంచ్‌ ఆఫర్ల పేరుతో ఫ్లాట్లు, విల్లాలు నిర్మిస్తామని కొనుగోలుదారుల నుంచి నిధులు సేకరించి, ప్రాజెక్టులను సకాలంలో పూర్తి చేయలేదనే ఆరోపణలపై తెలంగాణ పోలీసులు నమోదు చేసిన ఎఫ్‌ఐఆర్‌ల ఆధారంగా ఈడీ మనీలాండరింగ్‌ దర్యాప్తు చేపట్టింది. ఈ కేసులో గతంలో ఈడీ రూ.161 కోట్ల విలువైన ఆస్తులను అటాచ్‌ చేసింది. దర్యాప్తులో నిధుల మళ్లింపు, వాటి వినియోగం, సంబంధిత ఆస్తులపై ఈడీ దృష్టి సారించినట్లు గతంలో వెల్లడైంది.