జేడీ వాన్స్‌ వ్యాఖ్యలపై భారత్‌ కౌంటర్‌...

పర్మినెంట్‌ లేబర్‌ సర్టిఫికేషన్‌ ప్రోగ్రామ్‌ (PERM) నుంచి ఎనిమిది ప్రముఖ టెక్నాలజీ సంస్థలను సస్పెండ్‌ చేసిన అమెరికా ప్రభుత్వ నిర్ణయం, ఉపాధ్యక్షుడు జేడీ వాన్స్‌ వ్యాఖ్యలపై భారత ప్రభుత్వం తీవ్ర అభ్యంతరం వ్యక్తం చేసింది. ఈ జాబితాలో కాగ్నిజెంట్‌, ఇన్ఫోసిస్‌, టాటా కన్సల్టెన్సీ సర్వీసెస్‌ (టీసీఎస్‌), విప్రో, హెచ్‌సీఎల్‌ టెక్నాలజీస్‌, క్యాప్‌జెమిని, మైక్రోసాఫ్ట్‌, అడోబ్‌ ఉన్నాయి. విదేశీ ఉద్యోగులను ‘ఒప్పంద బానిసలు’గా అభివర్ణించిన వాన్స్‌ వ్యాఖ్యలు అనవసరమైనవని, అత్యంత అభ్యంతరకరమని భారత విదేశాంగ మంత్రిత్వ శాఖ పేర్కొంది. భారతీయ నిపుణులు అమెరికా ఆర్థిక వ్యవస్థకు, ఆవిష్కరణలకు కీలకంగా దోహదపడుతున్నారని తెలిపింది. పరిశోధన, ఉత్పాదకత, పోటీతత్వం, ఉద్యోగ కల్పన వంటి రంగాల్లో వారి సేవలు ఉపయోగపడుతున్నాయని వివరించింది. తరతరాల వలసదారుల శ్రమ, ప్రతిభ, ఆవిష్కరణలు అమెరికా అభివృద్ధికి తోడ్పడ్డాయని గుర్తుచేసింది.

నిపుణుల అంతర్జాతీయ తరలింపు ఇరు దేశాల ఆర్థిక వ్యవస్థలకు ప్రయోజనకరమని, పర్మ్‌ దరఖాస్తుల నిలిపివేత భారత్‌, అమెరికా ఉమ్మడి లక్ష్యాలకు దోహదపడదని కేంద్రం స్పష్టం చేసింది. ఈ నిర్ణయం వల్ల ఇప్పటికే చెల్లుబాటులో ఉన్న హెచ్‌-1బీ వీసాలు లేదా వాటి ఆధారంగా అమెరికాలో ఉంటున్న ఉద్యోగులు, వారి కుటుంబ సభ్యుల స్థితిపై తక్షణ ప్రభావం ఉండదని తెలిపింది. అయితే, సంబంధిత సంస్థల్లో పనిచేస్తూ గ్రీన్‌కార్డ్‌ కోసం దరఖాస్తు చేసుకునే అర్హులైన ఉద్యోగుల శాశ్వత నివాస ప్రక్రియకు ఆటంకం లేదా ఆలస్యం కలగవచ్చని పేర్కొంది. అమెరికాలో శాశ్వత నివాసం పొందేందుకు ఉపయోగించే ఉద్యోగ ఆధారిత ప్రక్రియలో పర్మ్‌ కీలక దశ. ఈ నిర్ణయంతో అమెరికాలో స్థిరపడాలని భావిస్తున్న భారతీయ నిపుణుల్లో ఆందోళన నెలకొంది. అయితే, తుది ప్రభావం వ్యక్తిగత పరిస్థితులు, దర్యాప్తుల పురోగతి, తదుపరి నిర్ణయాలపై ఆధారపడి ఉంటుంది.