రేడియల్ రోడ్ టెండర్లపై సమగ్ర విచారణకు కేటీఆర్ డిమాండ్

రూ.3,296 కోట్ల అంచనా వ్యయంతో చేపట్టనున్న రేడియల్ రోడ్‌-2 ప్రాజెక్టు టెండర్లలో భారీ అక్రమాలు జరిగాయని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ ఆరోపించారు. బుద్వేల్‌ ఔటర్‌ రింగ్‌ రోడ్డు నుంచి కొడంగల్‌ సమీపంలోని జాతీయ రహదారి 167ఎన్‌ వరకు 81.15 కిలోమీటర్ల మేర నిర్మించనున్న గ్రీన్‌ఫీల్డ్‌ ఎక్స్‌ప్రెస్‌వే టెండర్లలో పారదర్శకత లోపించిందని విమర్శించారు. పనులను మూడు ప్యాకేజీలుగా విభజించి, ముందస్తు ఒప్పందం ప్రకారం నచ్చిన సంస్థలకు కట్టబెట్టారని ఆరోపించారు. తక్కువ ధరలకు బిడ్లు వేసిన అర్హ సంస్థలను పక్కనపెట్టి, ఎక్కువ ధరలు కోట్ చేసిన సంస్థలకు పనులు కేటాయించడం ద్వారా ప్రజాధనానికి నష్టం కలిగిస్తున్నారని పేర్కొన్నారు.

ఈ వ్యవహారంపై సమగ్ర విచారణ జరిపించి టెండర్లను రద్దు చేయాలని కోరుతూ కేటీఆర్‌ శనివారం సీఎం రేవంత్‌ రెడ్డికి బహిరంగ లేఖ రాశారు. సెప్టెంబర్‌ 30తో బిడ్ల దాఖలు గడువు ముగియగా, అక్టోబర్‌ 8 నాటికే 13 బిడ్లకు సంబంధించిన సాంకేతిక మూల్యాంకనం, సంస్థల అర్హతల పరిశీలన, ఆర్థిక బిడ్ల పరిశీలన, కేటాయింపుల ప్రక్రియ పూర్తయినట్లు రికార్డులు చెబుతున్నాయని ఆయన పేర్కొన్నారు. కేవలం ఐదు పని దినాల్లోనే ఈ ప్రక్రియను ఎలా పూర్తి చేశారని ప్రశ్నించారు. బిడ్డర్లు సమర్పించిన పత్రాలను పూర్తిగా పరిశీలించారా, నిర్ణయాలకు సంబంధించిన ఆధారాలను నమోదు చేశారా అనే అంశాలపై ప్రభుత్వం స్పష్టత ఇవ్వాలని డిమాండ్‌ చేశారు. ఈ వేగవంతమైన ప్రక్రియ ముందస్తు నిర్ణయాలపై అనుమానాలు కలిగిస్తోందని ఆరోపించారు.