ప్రాదేశిక ఎన్నికల్లో డబ్బుల పంపిణీ.. మార్కాపురం, ప్రకాశంలో ఓటుకు నోటు!

ప్రాదేశిక ఎన్నికల పోలింగ్‌ నేపథ్యంలో మార్కాపురం, ప్రకాశం జిల్లాల్లో ఓటర్లను ఆకర్షించేందుకు అభ్యర్థులు నగదు పంపిణీకి పాల్పడుతున్నారనే ఆరోపణలు వినిపిస్తున్నాయి. మార్కాపురం జిల్లాలో జడ్పీటీసీ అభ్యర్థులు, ప్రకాశం జిల్లాలో ఎంపీటీసీ అభ్యర్థులు గ్రామాల్లో ఓటర్లకు డబ్బులు పంచుతున్నట్లు సమాచారం. మార్కాపురం జిల్లాలో అత్యధిక స్థానాలు ఇప్పటికే ఏకగ్రీవం కావడంతో మిగిలిన కొన్నిచోట్లే ప్రధాన పోటీ నెలకొంది. మొత్తం 21 జడ్పీటీసీ స్థానాలకు గాను ఆరు ఏకగ్రీవమయ్యాయి. మరో నాలుగు చోట్ల వైఎస్సార్‌సీపీ అభ్యర్థులు పోటీ నుంచి తప్పుకొన్నట్లు ప్రకటించడంతో 11 స్థానాలకు మాత్రమే ఎన్నికలు జరుగుతున్నాయి. వీటిలో మూడు, నాలుగు చోట్ల పోటీ హోరాహోరీగా ఉండనుంది. కూటమి తరఫున జడ్పీ ఛైర్మన్‌ రేసులో కందుల రామిరెడ్డి ముందంజలో ఉండగా, ఆయన పోటీ చేస్తున్న దోర్నాల స్థానంలో వైఎస్సార్‌సీపీ అభ్యర్థి బరిలో లేనట్లు సమాచారం. మరోవైపు వైఎస్సార్‌సీపీ జడ్పీ ఛైర్మన్‌ అభ్యర్థిగా ప్రచారంలో ఉన్న కోటపాటి సుధాకర్‌రెడ్డి పోటీ చేస్తున్న కొనకనమిట్ల మండలంలో గట్టి పోటీ నెలకొంది. జిల్లాలోని పలు మండలాల్లో ఓటుకు రూ.1,000 చొప్పున పంపిణీ చేస్తున్నట్లు ఆరోపణలు వస్తున్నాయి.

ప్రకాశం జిల్లాలో జడ్పీ ఛైర్మన్‌ అభ్యర్థి విషయంలో కూటమి, వైఎస్సార్‌సీపీ ఇప్పటివరకు అధికారికంగా ఎలాంటి ప్రకటన చేయలేదు. దీంతో రెండు పార్టీల నాయకులు తమ ఆధిపత్యాన్ని చాటుకునేందుకు ప్రయత్నిస్తున్నారు. జిల్లాలో రెండు జడ్పీటీసీ స్థానాలు ఏకగ్రీవం కాగా, మిగిలిన 25 స్థానాలకు ఎన్నికలు జరుగుతున్నాయి. సంతనూతలపాడు నియోజకవర్గంలో ఓటుకు రూ.1,000 చొప్పున పంపిణీ చేస్తున్నట్లు ఆరోపణలు వినిపిస్తున్నాయి. ముఖ్యంగా ఎంపీటీసీ స్థానాల ఎన్నికల్లో అభ్యర్థులు భారీగా ఖర్చు చేస్తున్నట్లు సమాచారం. కందుకూరు నియోజకవర్గంలో ఓటుకు రూ.500 నుంచి రూ.1,000 వరకు ఇస్తున్నట్లు ప్రచారం జరుగుతోంది. ఉలవపాడు, గుడ్లూరు మండలాల్లో నగదు పంపిణీ పోటాపోటీగా సాగుతున్నట్లు తెలుస్తోంది. దర్శి నియోజకవర్గంలో ఒక ఎంపీటీసీ స్థానానికే ఎన్నిక జరగనుండటంతో అక్కడ పోటీ అంతగా కనిపించడం లేదు. అద్దంకి, కొండపి నియోజకవర్గాల పరిధిలోని మండలాల్లో మెజారిటీల సాధనపై అభ్యర్థులు దృష్టి పెట్టారు. కొత్తపట్నం మండలంలో పోటీ తీవ్రంగా ఉంది. కొన్ని జడ్పీటీసీ స్థానాల ఎన్నికల కోసం రూ.3 కోట్ల వరకు ఖర్చు చేస్తున్నట్లు ప్రచారం జరుగుతోంది. ఈ నేపథ్యంలో నగదు పంపిణీ ఆరోపణలపై ఎన్నికల అధికారులు నిఘా పెంచాల్సిన అవసరం ఉందనే అభిప్రాయాలు వ్యక్తమవుతున్నాయి.