హుజూర్‌నగర్‌లో పేదల ఇళ్ల నిర్మాణ పనులను పరిశీలించనున్న మంత్రి ఉత్తమ్

రాష్ట్ర నీటిపారుదల, పౌర సరఫరాల శాఖ మంత్రి నల్లమాద ఉత్తమ్ కుమార్ రెడ్డి శుక్రవారం సూర్యాపేట జిల్లా హుజూర్‌నగర్‌లో పర్యటించనున్నారు. మధ్యాహ్నం 1 గంటకు పట్టణంలోని రామస్వామి గట్టు వద్ద పేదల కోసం నిర్మిస్తున్న 2,160 ఇళ్ల మోడల్ కాలనీ నిర్మాణ పనులను ఆయన పరిశీలించనున్నారు.

ఈ సందర్భంగా ఇళ్ల నిర్మాణ పురోగతి, మౌలిక సదుపాయాల కల్పన, కాలనీలో చేపట్టిన అభివృద్ధి పనులపై సంబంధిత అధికారులతో మంత్రి సమీక్షించనున్నారు. ఈ నెలలో కాంగ్రెస్ అగ్రనేత, లోక్‌సభ ప్రతిపక్ష నాయకుడు రాహుల్ గాంధీ చేతుల మీదుగా లబ్ధిదారులకు ఇళ్లను పంపిణీ చేసేందుకు ప్రభుత్వం ఏర్పాట్లు చేస్తోంది. ఈ నేపథ్యంలో మిగిలిన పనులను త్వరితగతిన పూర్తి చేసి, ఇళ్ల పంపిణీ కార్యక్రమాన్ని సజావుగా నిర్వహించేలా అధికారులకు మంత్రి సూచనలు చేయనున్నారు.