శబరిమల యాత్రికులకు గుడ్‌న్యూస్..

అయ్యప్ప భక్తులు చేపట్టే మండల-మకరవిళక్కు యాత్రల సీజన్ మరికొద్ది రోజుల్లో ప్రారంభం కానుండటంతో కేరళం ప్రభుత్వం శబరిమలలో ఏర్పాట్లను ముమ్మరం చేస్తోంది. ఈసారి యాత్రికులకు అత్యవసర సేవలు, ఎప్పటికప్పుడు సమాచారాన్ని అందించేందుకు శబరి పోర్టల్‌తో పాటు వాట్సప్ చాట్‌బాట్‌ను అందుబాటులోకి తీసుకురానుంది. యాత్రికులకు సంబంధించిన సేవలను ఒకే వేదికపైకి తీసుకురావడంతో పాటు, వివిధ ప్రభుత్వ శాఖల మధ్య సమన్వయాన్ని మెరుగుపరిచే లక్ష్యంతో జిల్లా యంత్రాంగం వీటిని రూపొందించింది. దర్శనం, రవాణా, వసతి, వైద్య సేవలు, అత్యవసర సహాయం వంటి వివరాలతో పాటు పంబ, నీలక్కల్, సన్నిధానం ప్రాంతాల్లో అందుబాటులో ఉన్న సదుపాయాల సమాచారాన్ని కూడా వీటి ద్వారా పొందవచ్చు.

వేర్వేరు కార్యాలయాల చుట్టూ తిరగాల్సిన అవసరం లేకుండా అన్ని సేవలను ఒకే వేదికపై అందించనున్నట్లు అధికారులు తెలిపారు. యాత్రలో ఎవరైనా తప్పిపోయినా, వస్తువులు పోగొట్టుకున్నా పోర్టల్ ద్వారా ఫిర్యాదు చేయవచ్చు. ఆ సమాచారం ఆటోమేటిక్‌గా పోలీసు కంట్రోల్‌రూమ్‌కు చేరుతుంది. అధికారులు తీసుకున్న చర్యల వివరాలను వాట్సప్ ద్వారా భక్తులకు తెలియజేస్తారు. తాగునీటి కేంద్రాలు, మరుగుదొడ్లు, వైద్య కేంద్రాలు, పార్కింగ్ ప్రదేశాలు, విశ్రాంతి భవనాలు, ఏటీఎంల వివరాలను గూగుల్ మ్యాపుల సాయంతో సులభంగా గుర్తించవచ్చు. రైళ్లు, బస్సుల సమాచారం, వివిధ వస్తువుల అధికారిక ధరలను సైతం పలు భాషల్లో తెలుసుకునే సదుపాయం కల్పించనున్నారు.