మొజ్తబా ఖమేనీపై రెండుసార్లు దాడి?.. సంచలన విషయాలు వెల్లడించిన ఇరాన్ నేత

ఇరాన్‌ సుప్రీం లీడర్‌ మొజ్తబా ఖమేనీ ఫిబ్రవరి 28న జరిగిన అమెరికా-ఇజ్రాయెల్‌ దాడుల్లో గాయపడిన అనంతరం మరో దాడి నుంచి కూడా త్రుటిలో బయటపడ్డారని ఇరాన్‌ అసెంబ్లీ ఆఫ్‌ ఎక్స్‌పర్ట్స్‌ సభ్యుడు మొహ్సెన్‌ హెయ్‌దరీ వెల్లడించారు. ఖతార్‌కు చెందిన అల్‌ అరబీ టెలివిజన్‌కు ఇచ్చిన ఇంటర్వ్యూలో ఆయన ఈ విషయాన్ని తెలిపారు. తొలిదాడిలో మొజ్తబా గాయపడటంతో ఆయనను ఆస్పత్రికి తరలించారని, అనంతరం ఆ ఆస్పత్రిపై కూడా దాడి జరగడంతో శిథిలాల కింద చిక్కుకున్న ఆయనను సజీవంగా బయటకు తీసినట్లు హెయ్‌దరీ పేర్కొన్నారు.

మొజ్తబా గాయపడిన తర్వాత టెహ్రాన్‌లోని మూడు ఆస్పత్రులపై దాడులు జరిగాయని, మూడో ఆస్పత్రిలో ఉన్న సమయంలో ఆయన శిథిలాల కింద చిక్కుకున్నారని హెయ్‌దరీ తెలిపారు. అనంతరం ఆయనను సురక్షిత ప్రాంతానికి తరలించి చికిత్స అందించినట్లు చెప్పారు. అలాగే తాను తదుపరి సుప్రీం లీడర్‌గా ఎంపికైన విషయం కూడా బహిరంగ ప్రకటన వెలువడే వరకు మొజ్తబాకు తెలియదని పేర్కొన్నారు. అయితే మొజ్తబా గాయాల తీవ్రతపై గతంలో భిన్నమైన వివరాలు వెలువడ్డాయి.