ఏపీలో కరవు లేదు.. తెలంగాణలో రేవంత్‌ వల్లే కరవు: కేటీఆర్‌

బీఆర్‌ఎస్‌ కార్యనిర్వాహక అధ్యక్షుడు, మాజీ మంత్రి కేటీఆర్‌ తెలంగాణలో కరవు పరిస్థితులపై సీఎం రేవంత్‌రెడ్డిపై విమర్శలు గుప్పించారు. తెలంగాణతో పోలిస్తే తక్కువ వర్షపాతం నమోదైనా ఆంధ్రప్రదేశ్‌లో కరవు పరిస్థితులు లేవని, ముఖ్యమంత్రి చంద్రబాబు ముందుచూపుతో నీటిని ఎత్తిపోసి వినియోగించుకోవడం వల్లే ఈ పరిస్థితి సాధ్యమైందని కేటీఆర్‌ అన్నారు. ఏపీలో కరవు, పంట విరామం వంటి పరిస్థితులు లేకుండా చూడటంలో చంద్రబాబు తీసుకున్న చర్యలను అభినందిస్తున్నట్లు తెలిపారు. తెలంగాణలో లోటు వర్షపాతం 17 నుంచి 20 శాతం మాత్రమే ఉన్నప్పటికీ, రాష్ట్రంలో కరవు రావడానికి సీఎం రేవంత్‌రెడ్డి కారణమని ఆరోపించారు.

కరవు పరిస్థితులపై రేవంత్‌రెడ్డి అవాస్తవాలు చెబుతున్నారని కేటీఆర్‌ విమర్శించారు. రాష్ట్రం కరవుతో ఇబ్బందులు ఎదుర్కొంటున్న సమయంలో మూసీ నది సుందరీకరణ చేపట్టాల్సిన అవసరం ఏమిటని ప్రశ్నించారు. మూసీ ప్రాజెక్టు పేరుతో రూ.1.50 లక్షల కోట్ల ప్రజాధనాన్ని దుర్వినియోగం చేసేందుకు ప్రభుత్వం సిద్ధమైందని ఆరోపించారు. కాంగ్రెస్‌ పాలిత రాష్ట్రాల్లో జరుగుతున్న పరిణామాలపై రాహుల్‌ గాంధీకి అవగాహన ఉందా అని ప్రశ్నించారు. మరోవైపు, మాజీ మంత్రి కొండా సురేఖ చేసిన వ్యాఖ్యలను ఇంకా పరిశీలించలేదని, వాటిని చూసిన తర్వాత తన న్యాయ బృందంతో చర్చిస్తానని చెప్పారు. తనపై వచ్చిన ఆరోపణలు నిలబడవని, ఇంకా క్షమాపణలు చెప్పాల్సిన వారు చాలామంది ఉన్నారని కేటీఆర్‌ వ్యాఖ్యానించారు.