రేపు రాత్రి హైదరాబాద్‌కు రాహుల్ గాంధీ

కాంగ్రెస్ అగ్రనేత, లోక్‌సభ ప్రతిపక్ష నేత రాహుల్ గాంధీ రేపు రాత్రి హైదరాబాద్‌కు రానున్నారు. నగరంలోని హెచ్‌ఐసీసీ నోవాటెల్‌లో ఆయన బస చేయనున్నారు. హైదరాబాద్ పర్యటనలో భాగంగా ఎల్లుండి ఉదయం 11 గంటలకు గిగ్ వర్కర్లతో రాహుల్ గాంధీ సమావేశం కానున్నారు. వారి సమస్యలు, ఎదుర్కొంటున్న సవాళ్లు, ఇతర అంశాలపై వారితో చర్చించనున్నారు.

అనంతరం ఎల్లుండి మధ్యాహ్నం హైదరాబాద్‌లో నిర్వహించనున్న భారత్ సమ్మిట్‌లో రాహుల్ గాంధీ పాల్గొని ప్రసంగించనున్నారు. పర్యటన ముగించుకుని అదే రోజు రాత్రి 8 గంటలకు ఆయన తిరిగి ఢిల్లీకి బయలుదేరనున్నారు. రాహుల్ పర్యటన నేపథ్యంలో కాంగ్రెస్ శ్రేణులు అవసరమైన ఏర్పాట్లు చేస్తున్నాయి.