గ్రామీణ అభివృద్ధి, సంక్షేమమే కూటమి విజయానికి కారణం: పవన్ కళ్యాణ్

జడ్పీటీసీ, ఎంపీటీసీ ఎన్నికల్లో కూటమి సాధించిన విజయానికి గ్రామీణ ప్రాంతాల్లో ప్రభుత్వం చేపట్టిన అభివృద్ధి కార్యక్రమాలు, అమలు చేస్తున్న సంక్షేమ పథకాలే ప్రధాన కారణమని జనసేన అధ్యక్షుడు, ఏపీ ఉప ముఖ్యమంత్రి పవన్ కళ్యాణ్ అన్నారు. జనసేన, టీడీపీ, బీజేపీ కూటమి అభ్యర్థులను గెలిపించిన ఓటర్లకు ఆయన కృతజ్ఞతలు తెలిపారు. ఎన్నికల ఫలితాలు ప్రభుత్వంపై ప్రజలకు ఉన్న నమ్మకాన్ని స్పష్టం చేస్తున్నాయని పేర్కొన్నారు. గ్రామీణ మౌలిక సదుపాయాల కల్పనకు ప్రాధాన్యమిస్తూ రహదారుల పునర్నిర్మాణం, రోడ్డు సౌకర్యం లేని ప్రాంతాలకు కనెక్టివిటీ, తాగునీటి సరఫరా పనులను వేగవంతం చేశామని వివరించారు.

ప్రధాని నరేంద్ర మోదీ నేతృత్వంలోని కేంద్ర ప్రభుత్వ సహకారంతో వి.బి.-జీ రామ్ జీ, సాస్కీ నిధులను సమర్థంగా వినియోగించుకున్నామని పవన్ కళ్యాణ్ తెలిపారు. ముఖ్యమంత్రి చంద్రబాబు నాయుడు అనుభవంతో పాలనను ముందుకు తీసుకెళ్తున్నామని చెప్పారు. రైతులకు అండగా నిలుస్తూ కొనుగోలు చేసిన ధాన్యానికి సంబంధించిన సొమ్మును 24 నుంచి 48 గంటల్లోనే వారి బ్యాంకు ఖాతాల్లో జమ చేస్తున్నామని వెల్లడించారు. గ్రామీణ అభివృద్ధి, సంక్షేమ పథకాలు, రైతులకు అందిస్తున్న భరోసానే కూటమి విజయానికి ప్రధాన కారణాలని పేర్కొంటూ, ప్రజలు తమపై ఉంచిన నమ్మకాన్ని నిలబెట్టుకుంటామని హామీ ఇచ్చారు.