ప్రధాని పదవిని త్యజించిన ఘనత సోనియాదే.. మహేశ్ కుమార్ గౌడ్

కాంగ్రెస్ అగ్రనేత సోనియా గాంధీ రచించిన ‘బిలాంగింగ్: ఏ జర్నీ ఆఫ్ లవ్’ పుస్తకంపై టీపీసీసీ అధ్యక్షుడు, ఎమ్మెల్సీ మహేశ్ కుమార్ గౌడ్ ప్రశంసలు కురిపించారు. ఈ పుస్తకంలో సోనియా గాంధీ తన జీవితంలోని ఎన్నో వ్యక్తిగత అనుభవాలతో పాటు బాధాకరమైన సంఘటనలను కూడా వివరించారని పేర్కొన్నారు. విదేశాల్లో జన్మించినప్పటికీ భారతీయ సంస్కృతి, సంప్రదాయాలను గౌరవించిన ఆదర్శ మహిళగా ఆమెను అభివర్ణించారు. దేశ రాజకీయాలను లోతుగా అర్థం చేసుకుని కాంగ్రెస్ పార్టీని సమర్థంగా నడిపిస్తున్న నాయకురాలిగా కొనియాడారు.

2004లో ప్రధానమంత్రి పదవిని స్వీకరించే అవకాశాన్ని వదులుకుని సోనియా గాంధీ త్యాగానికి నిదర్శనంగా నిలిచారని మహేశ్ కుమార్ గౌడ్ పేర్కొన్నారు. మన్మోహన్ సింగ్‌ను ప్రధానిగా ఎంపిక చేయడంలోనూ ఆమె కీలక పాత్ర పోషించారని గుర్తుచేశారు. ఇందిరా గాంధీ, సంజయ్ గాంధీ, రాజీవ్ గాంధీల మరణాలతో సోనియా తీవ్ర మానసిక వేదనకు గురయ్యారని, తన జీవితంలోని విషాదాలను ఈ పుస్తకంలో వెల్లడించారని తెలిపారు. పుస్తకంపై వస్తున్న రాజకీయ విమర్శలను పట్టించుకోవాల్సిన అవసరం లేదని, ప్రతి ఒక్కరూ ఈ పుస్తకాన్ని చదవాలని ఆయన సూచించారు.