సోనియా గాంధీ ఆత్మకథపై రాజకీయ దుమారం..బీజేపీ, వీహెచ్‌పీ విమర్శలు

కాంగ్రెస్ పార్లమెంటరీ పార్టీ చైర్‌పర్సన్ సోనియా గాంధీ తాజాగా విడుదల చేసిన ఆత్మకథ బిలాంగింగ్: ఎ జర్నీ ఆఫ్ లవ్ రాజకీయ వివాదానికి దారితీసింది. ఈ పుస్తకంలోని అంశాలను ప్రస్తావిస్తూ బీజేపీ, విశ్వహిందూ పరిషత్ (వీహెచ్‌పీ) సోనియా గాంధీతో పాటు కాంగ్రెస్ పార్టీపై విమర్శలు గుప్పించాయి. 1975 నాటి ఎమర్జెన్సీని సమర్థించే ప్రయత్నం చేస్తూనే, నెహ్రూ-గాంధీ కుటుంబం, కాంగ్రెస్ పార్టీ గతంలో చేసిన తప్పులను కప్పిపుచ్చేందుకు ఈ ఆత్మకథ ప్రయత్నిస్తోందని బీజేపీ జాతీయ అధికార ప్రతినిధి సి.ఆర్. కేశవన్ ఆరోపించారు. పుస్తకానికి ‘బిలాంగింగ్’ బదులుగా ‘వైట్‌వాషింగ్’ అని పేరు పెట్టి ఉండాల్సిందని ఎద్దేవా చేశారు. 1975లో తన అత్త, అప్పటి ప్రధాని ఇందిరాగాంధీ విధించిన ఎమర్జెన్సీని తప్పుగా సోనియా గాంధీ తన పుస్తకంలో పేర్కొన్నారు. ఇందిరాగాంధీ కూడా చివరికి ఇదే అభిప్రాయానికి వచ్చి ఉంటారని తాను భావిస్తున్నట్లు తెలిపారు. సంజయ్ గాంధీని అదుపులో ఉంచి ఉంటే ఎమర్జెన్సీ తర్వాత తలెత్తిన అనేక సమస్యలను నివారించగలిగేవారమని కూడా ఆమె తన ఆత్మకథలో రాశారు.

బాబ్రీ మసీదు కూల్చివేత, 2008 బాట్లా హౌస్ ఎన్‌కౌంటర్‌ అంశాలపై సోనియా గాంధీ చేసిన వ్యాఖ్యలను కూడా కేశవన్ ప్రశ్నించారు. 1984లో సిక్కులపై జరిగిన హింసాకాండ, ఉగ్రదాడుల్లో ప్రాణాలు కోల్పోయిన భద్రతా సిబ్బంది, అమాయకుల విషయంలోనూ ఆమె అదే స్థాయిలో విచారం వ్యక్తం చేశారా అని ప్రశ్నించారు. మరోవైపు, సోనియా గాంధీ హిందువుల మనోభావాలను దెబ్బతీస్తూ బుజ్జగింపు రాజకీయాలకు పాల్పడుతున్నారని వీహెచ్‌పీ ఆరోపించింది. ముస్లిం ఓటుబ్యాంకును ఆకర్షించేందుకే ఆమె విచారం వ్యక్తం చేస్తున్నారని వీహెచ్‌పీ కేంద్ర సంయుక్త ప్రధాన కార్యదర్శి సురేంద్ర జైన్ విమర్శించారు. ఈ వ్యాఖ్యలకు సోనియా గాంధీ క్షమాపణలు చెప్పాలని డిమాండ్ చేశారు. బాబ్రీ మసీదు కూల్చివేత, బాట్లా హౌస్ ఎన్‌కౌంటర్‌పై స్పందించిన ఆమె.. హిందువులపై జరిగిన హింస, బాట్లా హౌస్ ఘటనలో గాయపడి చికిత్స పొందుతూ మరణించిన పోలీసు అధికారి మోహన్ చంద్ర శర్మ విషయంలో మౌనంగా ఉన్నారని జైన్ ఆరోపించారు. ఈ విమర్శలతో సోనియా గాంధీ ఆత్మకథ విడుదల చుట్టూ రాజకీయ చర్చ మరింత వేడెక్కింది.