బిగ్‌బాస్ తెలుగు 10 డే 9 ప్రోమో 2: రోహిత్, త్రిగుణ్, షాలిని రచ్చతో హౌస్‌లో హై వోల్టేజ్ డ్రామా

బిగ్‌బాస్ తెలుగు 10 రెండో వారం కెప్టెన్సీ టాస్క్ మరింత రసవత్తరంగా మారుతోంది. త్రిగుణ్, రోహిత్, షాలిని, అమన్, దేబ్జానీ, ముకేష్, ఝాన్సీ, రాం ప్రసాద్ కెప్టెన్సీ కంటెండర్లుగా ఎంపికయ్యారు. టాస్క్‌లో భాగంగా రోహిత్, రాం ప్రసాద్, త్రిగుణ్, షాలిని కెప్టెన్సీ రేసు నుంచి బయటకు వెళ్లారు. తాజాగా విడుదలైన ప్రోమోలో రోహిత్, త్రిగుణ్ మరోసారి మాటల యుద్ధానికి దిగారు. తనకంటే రాం ప్రసాద్ బలమైన పోటీదారుగా అనిపించడంతోనే అతడిని టాస్క్ నుంచి తప్పించానని రోహిత్ చెప్పాడు. అయితే మాట మార్చుతున్నావంటూ రాం ప్రసాద్ ప్రశ్నించగా.. తాను నిర్ణయం మార్చుకున్నానని రోహిత్ స్పష్టం చేశాడు.

మరోవైపు రోహిత్ గతంలో తనపై ఉపయోగించిన ‘భజన’ వ్యాఖ్యను ఝాన్సీ ప్రశ్నించింది. తన ఆటను చూసే ఆ మాట అన్నానని రోహిత్ చెప్పడంతో.. ఝాన్సీ వ్యంగ్యంగా డ్యాన్స్ చేస్తూ కౌంటర్ ఇచ్చింది. ఈ వివాదంలో త్రిగుణ్ జోక్యం చేసుకోవడంతో రోహిత్, త్రిగుణ్ మధ్య మరోసారి వాగ్వాదం జరిగింది. ఇదిలా ఉంటే.. ఆదివారం టాస్క్ సమయంలో రాం ప్రసాద్ వ్యవహరించిన తీరుపై షాలిని ప్రశ్నించి, అతని బెలూన్ పగలగొట్టి కెప్టెన్సీ రేసు నుంచి తప్పించింది. అనంతరం ఈ వ్యవహారంపై దేబ్జానీ, షాలినిని ప్రశ్నించడంతో ఇద్దరి మధ్య కూడా తీవ్ర వాగ్వాదం చోటుచేసుకుంది. దీంతో కెప్టెన్సీ టాస్క్‌లో హౌస్‌మేట్స్ మధ్య విభేదాలు మరింత ముదిరేలా కనిపిస్తున్నాయి.