ఐపీఎల్‌లో ఆడేందుకు ఆమిర్‌ మాస్టర్‌ ప్లాన్‌

పాకిస్థాన్ మాజీ ఫాస్ట్ బౌలర్ మహ్మద్ ఆమిర్ ఐపీఎల్‌లో ఆడాలనే ఆసక్తిని చాలాకాలంగా వ్యక్తం చేస్తున్నాడు. అయితే, అతడు పాకిస్థాన్‌కు చెందిన ఆటగాడు కావడంతో ఇప్పటివరకు ఐపీఎల్‌లో పాల్గొనే అవకాశం దక్కలేదు. తాజాగా 2027 ఐపీఎల్ వేలంలో తన పేరును నమోదు చేసుకునేందుకు ఆమిర్ సిద్ధమవుతున్నట్లు వార్తలు వస్తున్నాయి. ఈ వేలం డిసెంబర్ రెండో లేదా మూడో వారంలో జరిగే అవకాశం ఉంది. అంతకంటే ముందు నవంబర్ 15లోగా పది ఫ్రాంచైజీలు తమ రిటైన్ చేసుకున్న ఆటగాళ్ల జాబితాను ప్రకటించాల్సి ఉంటుంది. అయితే, ఆమిర్ వేలంలో పాల్గొనేందుకు అర్హత సాధిస్తాడా లేదా అన్నది ఇంకా స్పష్టత లేదు.

మంగళవారం జరగనున్న అఫ్గానిస్థాన్ ప్రీమియర్ లీగ్ (ఏపీఎల్) డ్రాఫ్ట్‌లోనూ మహ్మద్ ఆమిర్ పేరు ఉంది. అయితే, అతడు పాకిస్థాన్ ఆటగాడిగా కాకుండా యూకే పౌరుడిగా తన పేరును నమోదు చేసుకున్నట్లు సమాచారం. యూకేకు చెందిన న్యాయవాది నర్జిస్ ఖాన్‌ను వివాహం చేసుకున్న ఆమిర్.. అవసరమైన చట్టపరమైన ప్రక్రియలు, పౌరసత్వ పరీక్ష పూర్తి చేసి ఈ ఏడాది మేలో బ్రిటిష్ పాస్‌పోర్ట్ పొందాడు. దీంతో ఇంగ్లండ్ క్రికెట్‌లో విదేశీ ఆటగాడిగా కాకుండా స్థానిక ఆటగాడిగా రిజిస్టర్ చేసుకున్నాడు. ఇప్పుడు ఏపీఎల్‌లో మాత్రం ఓవర్సీస్ ఆటగాడిగా నమోదు కావడం ఆసక్తికరంగా మారింది. ఏపీఎల్‌లో ఎంపికైతే ఐపీఎల్‌లోనూ బ్రిటిష్ పౌరుడిగా ఆడేందుకు ప్రయత్నించవచ్చని కథనాలు పేర్కొంటున్నాయి. అయితే, దీనిపై బీసీసీఐ నిబంధనలు, అనుమతి కీలకం కానున్నాయి.