ఐపీఎల్ వేలానికి ముందు సీఎస్‌కేలో కీలక మార్పులు.

ఐపీఎల్ 2027 మినీ వేలానికి ముందు చెన్నై సూపర్ కింగ్స్ (సీఎస్‌కే) జట్టులో కీలక మార్పులు చోటుచేసుకునే అవకాశాలు కనిపిస్తున్నాయి. గత వేలంలో భారీ ధరకు కొనుగోలు చేసిన యువ ఆటగాళ్లు ప్రశాంత్ వీర్, కార్తిక్ శర్మ భవిష్యత్తుపై ఫ్రాంచైజీ పునరాలోచన చేస్తున్నట్లు సమాచారం. వీరిద్దరినీ సీఎస్‌కే ఒక్కొక్కరిని రూ.14.2 కోట్లకు సొంతం చేసుకుంది. అయితే తొలి సీజన్‌లో ప్రశాంత్ ఆశించిన స్థాయిలో రాణించకపోగా, కార్తిక్ తన బ్యాటింగ్‌తో ఆకట్టుకున్నాడు. దీంతో మినీ వేలానికి ముందు ప్రశాంత్‌ను విడుదల చేసే అవకాశాలున్నాయనే ప్రచారం జరుగుతోంది. యువ ఆటగాళ్లతో జట్టును బలోపేతం చేయాలనే లక్ష్యంతో సీఎస్‌కే వీరిద్దరిపై భారీగా పెట్టుబడి పెట్టింది. అయినప్పటికీ ప్రశాంత్ ప్రదర్శన నిరాశపరచడంతో అతడిని కొనసాగించే విషయంలో యాజమాన్యం ఆలోచనలో పడినట్లు తెలుస్తోంది.

ఉత్తరప్రదేశ్‌కు చెందిన 20 ఏళ్ల ఎడమచేతి వాటం స్పిన్ ఆల్‌రౌండర్ ప్రశాంత్ వీర్ ఐపీఎల్ 2026లో ఆరు మ్యాచ్‌లు ఆడి, ఐదు ఇన్నింగ్స్‌ల్లో 90 పరుగులు చేశాడు. బౌలింగ్‌లో ఒక్క వికెట్ కూడా సాధించలేకపోయాడు. బెంగళూరుతో జరిగిన మ్యాచ్‌లో చేసిన 43 పరుగులే అతడి అత్యధిక స్కోరు. మరోవైపు రాజస్థాన్‌కు చెందిన 20 ఏళ్ల వికెట్ కీపర్ బ్యాటర్ కార్తిక్ శర్మ 11 మ్యాచ్‌ల్లో 32.77 సగటుతో 295 పరుగులు చేశాడు. లక్నో సూపర్ జెయింట్స్‌తో జరిగిన మ్యాచ్‌లో 71 పరుగులతో ఆకట్టుకున్నాడు. దీంతో కార్తిక్‌ను కొనసాగించేందుకు సీఎస్‌కే మొగ్గు చూపవచ్చని తెలుస్తోంది. ప్రస్తుతం జట్టు పర్స్‌లో రూ.2.4 కోట్లు ఉన్నట్లు సమాచారం. జీతాల పరిమితిలో వార్షికంగా రూ.5 కోట్ల పెంపు లభిస్తే ఈ మొత్తం రూ.7.4 కోట్లకు చేరవచ్చు. ప్రశాంత్‌ను విడుదల చేసి, వేలంలో తక్కువ ధరకు తిరిగి కొనుగోలు చేయడం ద్వారా నిధులను ఆదా చేసుకోవాలని సీఎస్‌కే భావిస్తున్నట్లు వార్తలు వస్తున్నాయి. అయితే ఈ ఇద్దరు ఆటగాళ్ల విషయంలో ఫ్రాంచైజీ ఇంకా తుది నిర్ణయం తీసుకోలేదు.