అనహత్‌ సింగ్‌ చరిత్ర.. వరల్డ్‌ జూనియర్‌ స్క్వాష్‌ ఫైనల్‌కు దూసుకెళ్లిన భారత స్టార్‌

భారత యువ స్క్వాష్‌ సంచలనం అనహత్ సింగ్ వరల్డ్‌ జూనియర్‌ స్క్వాష్‌ చాంపియన్‌షిప్‌లో చరిత్ర సృష్టించింది. సెమీఫైనల్లో ఈజిప్ట్‌కు చెందిన బార్బ్‌ సమేహ్‌పై 11-3, 8-11, 11-4, 11-6తో విజయం సాధించి టైటిల్‌ పోరుకు అర్హత సాధించింది. తొలి గేమ్‌ను సునాయాసంగా సొంతం చేసుకున్న అనహత్‌.. రెండో గేమ్‌ను కోల్పోయినప్పటికీ అద్భుతంగా పుంజుకుంది. తర్వాతి రెండు గేమ్‌లలో ప్రత్యర్థిపై ఆధిపత్యం ప్రదర్శించి చిరస్మరణీయ విజయాన్ని అందుకుంది.

ఈ విజయంతో 2005లో జోష్న చిన్నప్ప తర్వాత వరల్డ్‌ జూనియర్‌ స్క్వాష్‌ చాంపియన్‌షిప్‌ ఫైనల్‌కు చేరిన తొలి భారత క్రీడాకారిణిగా అనహత్‌ నిలిచింది. రెండు దశాబ్దాల తర్వాత భారత్‌కు ఈ ఘనత అందించిన అనహత్‌.. తన కెరీర్‌లో మరో కీలక మైలురాయిని చేరుకుంది. ఫైనల్లో ఈజిప్ట్‌కు చెందిన రుకయ్యా సలీమ్‌తో తలపడనున్న అనహత్‌.. చారిత్రక టైటిల్‌ను సొంతం చేసుకోవాలనే పట్టుదలతో బరిలోకి దిగనుంది.