నేడే అర్జెంటీనా vs అల్జీరియా హైవోల్టేజ్ పోరు.. మెస్సీ చారిత్రక మైలురాయిపై అందరి దృష్టి!

ఫుట్‌బాల్ ప్రపంచం ఆసక్తిగా ఎదురుచూస్తున్న అర్జెంటీనా-అల్జీరియా గ్రూప్-జె పోరుకు సమయం ఆసన్నమైంది. డిఫెండింగ్ ఛాంపియన్ హోదాలో బరిలోకి దిగుతున్న అర్జెంటీనా జట్టుకు లయనెల్ మెస్సీ ప్రధాన ఆకర్షణగా నిలిచాడు. తన కెరీర్‌లో చివరి వరల్డ్‌కప్ కావొచ్చనే అంచనాల మధ్య మెస్సీ మరోసారి జట్టును విజయపథంలో నడిపించాలని లక్ష్యంగా పెట్టుకున్నాడు.

ఈ మ్యాచ్ మెస్సీకి ప్రత్యేక ప్రాధాన్యం సంతరించుకుంది. బరిలోకి దిగితే ఆయన అంతర్జాతీయ కెరీర్‌లో 200వ మ్యాచ్ ఆడిన అరుదైన ఘనత సాధిస్తాడు. ఇటీవల హోండురాస్‌తో జరిగిన మ్యాచ్‌కు దూరమైన మెస్సీ, ఐస్‌లాండ్‌తో జరిగిన పోరులో సబ్‌స్టిట్యూట్‌గా వచ్చి పెనాల్టీ గోల్ సాధించి అర్జెంటీనాకు 3-0 విజయం అందించాడు. దీంతో అల్జీరియాపై కూడా మెస్సీ తన ముద్ర వేస్తాడా అనే ఆసక్తి అభిమానుల్లో నెలకొంది.