ఆసియా క్రీడల్లో భారత ఉషు స్టార్ రోషిబినా దేవి దూకుడు..

ఆసియా క్రీడల్లో భారత ఉషు స్టార్ రోషిబినా దేవి పసిడి పతక రేసులో దూసుకెళ్లింది. మహిళల 60 కేజీల సాండా విభాగంలో 25 ఏళ్ల రోషిబినా బుధవారం జరిగిన సెమీఫైనల్లో అద్భుత ప్రదర్శన కనబరిచింది. ఇండోనేషియాకు చెందిన థానియా కుసుమనింగ్త్యాస్‌పై 2-0తో విజయం సాధించి ఫైనల్ బెర్త్‌ను ఖరారు చేసుకుంది.

ఇక గురువారం జరిగే ఫైనల్లో చైనాకు చెందిన షియాయు ఝాంగ్‌తో రోషిబినా తలపడనుంది. ఈ పోరులో విజయం సాధిస్తే భారత ఖాతాలో మరో పసిడి పతకం చేరనుంది. సెమీఫైనల్లో చూపించిన దూకుడును ఫైనల్లోనూ కొనసాగించి అగ్రస్థానంలో నిలవాలని రోషిబినా లక్ష్యంగా పెట్టుకుంది.