ముంబై ఇండియన్స్ కెప్టెన్సీకి మళ్లీ రోహిత్ ఓకే..

ముంబై ఇండియన్స్ కెప్టెన్సీ బాధ్యతలను రోహిత్ శర్మ మరోసారి చేపట్టేందుకు అంగీకరించినట్లు సమాచారం. తొలుత జట్టు కెప్టెన్సీ కోసం యువ ఆటగాడు టిలక్ వర్మ పేరును రోహిత్ సూచించినట్లు తెలుస్తోంది. అయితే అనుభవజ్ఞుడైన రోహితే జట్టును ముందుండి నడిపించాలని ముంబై ఇండియన్స్ యాజమాన్యం భావించినట్లు సమాచారం. ఈ నేపథ్యంలో మరోసారి కెప్టెన్సీ బాధ్యతలు చేపట్టాలని రోహిత్‌ను కోరినట్లు కథనాలు వెల్లడిస్తున్నాయి.

ఫ్రాంచైజీ విజ్ఞప్తికి రోహిత్ సానుకూలంగా స్పందించి మళ్లీ కెప్టెన్‌గా వ్యవహరించేందుకు అంగీకరించినట్లు తెలుస్తోంది. ఐపీఎల్‌లో అపార అనుభవం, నాయకత్వ ప్రతిభ కలిగిన రోహిత్ తిరిగి బాధ్యతలు చేపడితే ముంబై ఇండియన్స్‌కు కీలక పరిణామంగా మారనుంది. అయితే ఈ విషయంపై జట్టు యాజమాన్యం నుంచి అధికారిక ప్రకటన రావాల్సి ఉంది.