మహిళల ఆసియాకప్‌లో థాయ్‌లాండ్‌కు శుభారంభం

దుబాయ్‌లో జరిగిన మహిళల ఆసియా కప్‌ టి20 టోర్నమెంట్‌లో థాయ్‌లాండ్‌ శుభారంభం చేసింది. శుక్రవారం జరిగిన తొలి మ్యాచ్‌లో హాంకాంగ్‌ను 6 పరుగుల తేడాతో ఓడించింది. టాస్‌ ఓడి ముందుగా బ్యాటింగ్‌కు దిగిన థాయ్‌లాండ్‌ 20 ఓవర్లలో 9 వికెట్ల నష్టానికి 120 పరుగులు చేసింది. కెప్టెన్‌ నరుమోల్‌ చాయ్‌వై 31 బంతుల్లో 43 పరుగులతో జట్టు తరఫున అత్యధిక స్కోరు సాధించారు. ఆమె ఇన్నింగ్స్‌లో 4 ఫోర్లు, 2 సిక్స్‌లు ఉన్నాయి. హాంకాంగ్‌ బౌలర్లలో మరీనా 4 వికెట్లు పడగొట్టింది.

121 పరుగుల లక్ష్యంతో బరిలోకి దిగిన హాంకాంగ్‌ ఒక దశలో 84/3తో విజయం దిశగా సాగింది. అయితే చివరి దశలో థాయ్‌లాండ్‌ బౌలర్లు పుంజుకోవడంతో హాంకాంగ్‌ వరుసగా వికెట్లు కోల్పోయింది. చివరకు 20 ఓవర్లలో 7 వికెట్లకు 114 పరుగులు మాత్రమే చేసి 6 పరుగుల తేడాతో ఓటమి పాలైంది. కారీ చాన్‌, యాస్మీన్‌ చెరో 28 పరుగులు చేయగా, మరీనా 11 బంతుల్లో 22 పరుగులతో వేగంగా ఆడింది. అయినప్పటికీ హాంకాంగ్‌కు విజయం దక్కలేదు. తదుపరి మ్యాచ్‌లో యూఏఈతో శ్రీలంక తలపడనుంది.