“విరాట్‌ కోహ్లీ ఉంటే మ్యాచ్‌ ఫలితం మరోలా ఉండేది” - మహ్మద్‌ కైఫ్‌

శ్రీలంకతో రెండో టెస్టు చివరి రోజు నాలుగు వికెట్లు తీయాల్సి ఉన్నా భారత బౌలర్లు ఆ లక్ష్యాన్ని చేరుకోలేకపోయారు. దీంతో మ్యాచ్‌ డ్రాగా ముగిసింది. ఈ ఫలితంతో ప్రపంచ టెస్టు ఛాంపియన్‌షిప్‌లో భారత్‌ పర్సంటేజీ కూడా తగ్గింది. ప్రత్యర్థికి ఫాలోఆన్‌ ఇచ్చిన తర్వాత కూడా సరైన వ్యూహాలను అమలు చేయడంలో భారత్‌ విఫలమైందని మాజీ క్రికెటర్‌ మహ్మద్‌ కైఫ్‌ విమర్శించాడు. ముఖ్యంగా శ్రీలంక బ్యాటర్‌ సోనాల్‌ దినుషను నియంత్రించడంలో టీమ్‌ఇండియా విఫలమైందని పేర్కొన్నాడు. విరాట్‌ కోహ్లీ ఉండి ఉంటే మ్యాచ్‌ ఫలితం మరోలా ఉండేదేమోనని అభిప్రాయపడ్డాడు.

టెస్టు క్రికెట్‌లో బౌలింగ్‌ ఎటాక్‌ను నిరంతరం కొనసాగిస్తూ ప్రత్యర్థిపై ఒత్తిడి పెంచాల్సి ఉంటుందని కైఫ్‌ అన్నాడు. ఈ మ్యాచ్‌లో బంతి బాగా తిరుగుతోందని భావించి వికెట్లు సులభంగా లభిస్తాయని భారత ఆటగాళ్లు తేలిగ్గా తీసుకున్నట్లుగా అనిపించిందని పేర్కొన్నాడు. సోనాల్‌ దినుష మాత్రం ఎలాంటి ఒత్తిడికి గురికాకుండా ప్రశాంతంగా బ్యాటింగ్‌ చేశాడని తెలిపాడు. భారత ఆటగాళ్లు ఎక్కువగా లాహిరు కుమార, ప్రభాత్‌ జయసూర్య వంటి లోయర్‌ ఆర్డర్‌ బ్యాటర్లపై దృష్టి పెట్టినట్లు కనిపించిందని, కానీ దినుషపై అదే స్థాయిలో ఒత్తిడి తీసుకురాలేకపోయారని చెప్పాడు. విరాట్‌ కోహ్లీ, రోహిత్‌ శర్మ, రవిచంద్రన్‌ అశ్విన్‌, ఎంఎస్‌ ధోనీ వంటి అనుభవజ్ఞులైన ఆటగాళ్లు ప్రత్యర్థులపై మానసిక ఒత్తిడి పెంచేవారని గుర్తుచేశాడు. అలాంటి అనుభవం, ఎనర్జీ ఈసారి టీమ్‌ఇండియా కోల్పోయిందని కైఫ్‌ వ్యాఖ్యానించాడు.