సైబర్ సెక్యూరిటీ కోసం కొత్త ఏఐ మోడల్.. ఓపెన్‌ఏఐ కీలక ప్లాన్?

ఓపెన్‌ఏఐ సైబర్ సెక్యూరిటీ కోసం ప్రత్యేకంగా రూపొందించిన కొత్త ఆర్టిఫిషియల్ ఇంటెలిజెన్స్ మోడల్‌ను సిద్ధం చేస్తున్నట్లు సమాచారం. GPT-6 Cyberగా పిలవబడే ఈ మోడల్‌ను రాబోయే వారాల్లో ప్రివ్యూ దశలో విడుదల చేసే అవకాశం ఉందని Fortune కథనం పేర్కొంది. ఈ వివరాలను ఈ వ్యవహారంపై అవగాహన ఉన్న పలువురు వ్యక్తులను ఉటంకిస్తూ వెల్లడించినట్లు కథనం తెలిపింది. అయితే మోడల్ విడుదలకు సంబంధించి కచ్చితమైన తేదీ ఇంకా వెల్లడించలేదు.

GPT-6 Cyberతో పాటు కొత్త ప్రొడక్ట్‌ను కూడా ఓపెన్‌ఏఐ తీసుకురావచ్చని సమాచారం. వినియోగదారులు ఈ ఏఐ మోడల్‌ను మరింత సురక్షితంగా డిప్లాయ్ చేసుకోవడంతో పాటు సైబర్ సెక్యూరిటీ వర్క్‌ఫ్లోలను ఆటోమేట్ చేసుకునేందుకు ఈ ప్రొడక్ట్ ఉపయోగపడుతుందని తెలుస్తోంది. అయితే ఇది డిజిటల్ సర్వీసా, హార్డ్‌వేర్ పరికరమా లేదా మరో రకమైన ఉత్పత్తా అనే విషయంపై ఇంకా స్పష్టత లేదు.

ఇప్పటికే GPT-6 Cyber ఆల్ఫా టెస్టింగ్ దశలో ఉన్నట్లు సమాచారం. OpenAI నిర్వహిస్తున్న అప్లికేషన్-ఓన్లీ Daybreak Red ప్రోగ్రామ్ ద్వారా పరిమిత సంఖ్యలో వినియోగదారులు ఈ మోడల్‌ను పరీక్షిస్తున్నట్లు తెలుస్తోంది. ఇందులో Blue, Red అనే యాక్సెస్ స్థాయిలు ఉన్నట్లు సమాచారం. Blue టియర్ ద్వారా సాధారణ వినియోగానికి విస్తృత యాక్సెస్, Red టియర్ ద్వారా మరింత అధునాతన సైబర్ సెక్యూరిటీ ఉత్పత్తులకు యాక్సెస్ లభిస్తుందని నివేదిక పేర్కొంది.

సైబర్ సెక్యూరిటీ లోపాలను గుర్తించి వాటికి ఆటోమేటిక్‌గా ప్యాచ్‌లు వేయడం, దాడి చేసేవారు భద్రతా లోపాలను ఉపయోగించుకోకుండా అడ్డుకోవడం వంటి సామర్థ్యాలు GPT-6 Cyberలో ఉండొచ్చని సమాచారం. అలాగే ఓపెన్‌ఏఐకి తన ఏఐ మోడళ్లను సైబర్ సెక్యూరిటీ వర్క్‌ఫ్లోల్లో ఎలా ఉపయోగిస్తున్నారనే దానిపై మెరుగైన పర్యవేక్షణ కల్పించే అవకాశం ఉందని తెలుస్తోంది.

ఇటీవల ఓపెన్‌ఏఐకు సంబంధించిన కొన్ని సైబర్ సెక్యూరిటీ ఘటనలు వెలుగులోకి వచ్చిన నేపథ్యంలో ఈ అభివృద్ధి ప్రాధాన్యం సంతరించుకుంది. ఒక ఘటనలో ఓపెన్‌ఏఐ అంతర్గత మోడల్ శాండ్‌బాక్స్ పరిమితులను దాటి పబ్లిక్ ఇంటర్నెట్‌ను యాక్సెస్ చేసి, Hugging Faceకు సంబంధించిన సిస్టమ్స్‌పై దాడికి పాల్పడినట్లు సమాచారం. మరో ఘటనలో ఎథికల్ హ్యాకర్లు కొన్ని కీలక భద్రతా లోపాలను ఉపయోగించుకుని ఓపెన్‌ఏఐ అంతర్గత రిపాజిటరీలు, కనెక్టర్లను యాక్సెస్ చేసినట్లు నివేదికలు వచ్చాయి. ఆ లోపాలను అనంతరం ఓపెన్‌ఏఐ ప్యాచ్ చేసినట్లు సమాచారం.