అమెరికాలో డేటా సెంటర్ల విస్తరణ ఆపేది లేదు-ఓపెన్‌ఏఐ

అమెరికాలో డేటా సెంటర్ల ఏర్పాటుపై వ్యతిరేకత పెరుగుతున్నప్పటికీ వాటి విస్తరణ ప్రణాళికలను కొనసాగిస్తామని ఓపెన్‌ఏఐ స్పష్టం చేసింది. ఇటీవల జరిగిన మధ్యంతర ఎన్నికల తర్వాత ఈ కేంద్రాలపై ప్రభుత్వ పర్యవేక్షణ, నియంత్రణలు మరింత కఠినమవుతాయన్న అంచనాలు వ్యక్తమవుతున్నాయి. అయినప్పటికీ, ఏఐ సేవలకు పెరుగుతున్న డిమాండ్‌ను తీర్చేందుకు పెట్టుబడులు కొనసాగిస్తామని సంస్థ చీఫ్ ఫైనాన్షియల్ ఆఫీసర్ సారా ఫ్రైయర్ సీఎన్‌బీసీకి ఇచ్చిన ఇంటర్వ్యూలో తెలిపారు. స్థానిక ప్రజల ఆందోళనలను పరిష్కరించేందుకు ప్రభుత్వ అధికారులతో డేటా సెంటర్ల ఏర్పాటుపై చర్చలు జరిపే సమయంలో ఇకపై నాన్-డిస్క్లోజర్ అగ్రిమెంట్లు (ఎన్‌డీఏలు) ఉపయోగించబోమని సంస్థ ప్రకటించింది. నిర్మాణ ప్రణాళికలు, వాటి వల్ల కలిగే ప్రభావాల వివరాలను స్థానిక ప్రజలకు అందుబాటులో ఉంచుతామని వెల్లడించింది.

అమెరికా మధ్యంతర ఎన్నికల్లో డేటా సెంటర్లపై పెరుగుతున్న వ్యతిరేకత ప్రధాన చర్చనీయాంశంగా మారింది. ఈ కేంద్రాలపై కఠిన పర్యవేక్షణకు పలువురు డెమొక్రటిక్ అభ్యర్థులు హామీ ఇచ్చారు. డేటా సెంటర్ల నిర్మాణం ఆలస్యమయ్యే అవకాశం ఉందన్న ఆందోళనలతో గురువారం అమెరికా స్టాక్ మార్కెట్‌లో సుమారు 2.5 ట్రిలియన్ డాలర్ల విలువ ఆవిరైనట్లు నివేదిక పేర్కొంది. మరోవైపు, వ్యోమింగ్‌లో తన తొలి డేటా సెంటర్ నిర్మాణానికి 17 బిలియన్ డాలర్లు పెట్టుబడి పెట్టనున్నట్లు గూగుల్ ప్రకటించింది. ఇదిలా ఉండగా, ఓపెన్‌ఏఐ కొత్తగా నిధుల సమీకరణ చేపడుతోందని సారా ఫ్రైయర్ వెల్లడించారు. 2026 మూడో త్రైమాసికంలో సంస్థ వ్యాపారం త్రైమాసిక ప్రాతిపదికన 70 శాతం వృద్ధి చెందగా, ఎంటర్‌ప్రైజ్ విభాగంలో డిమాండ్ రెట్టింపైనట్లు తెలిపారు.