కఠినతరం కానున్న కేఫ్‌-3 ఇంధన సామర్థ్య నిబంధనలు

ప్యాసింజర్ వాహనాల తయారీదారులకు ఇంధన సామర్థ్యం, కర్బన ఉద్గారాలపై మరింత కఠిన లక్ష్యాలను నిర్దేశిస్తూ కేంద్ర ప్రభుత్వం మూడో దశ కార్పొరేట్ యావరేజ్ ఫ్యూయల్ ఎకానమీ (కేఫ్‌-3) నిబంధనలను అధికారికంగా ప్రకటించింది. ఈ నిబంధనలు 2027 ఏప్రిల్ 1 నుంచి 2032 మార్చి 31 వరకు అమల్లో ఉంటాయి. ఐదేళ్లలో వాహనాల సగటు ఇంధన సామర్థ్యాన్ని సుమారు 16.7 శాతం మెరుగుపరచడం లక్ష్యంగా పెట్టుకుంది.

కేఫ్‌-3 నిబంధనల ప్రకారం 2027-28లో 100 కిలోమీటర్లకు 3.996 లీటర్లుగా ఉన్న ఇంధన వినియోగ ప్రమాణాన్ని 2031-32 నాటికి 3.3273 లీటర్లకు తగ్గించాలి. అదే సమయంలో కిలోమీటరుకు కర్బన ఉద్గారాలను సుమారు 94.8 గ్రాముల నుంచి 78.9 గ్రాములకు తగ్గించాల్సి ఉంటుంది. భారత్‌లో తయారు చేసే లేదా విక్రయించేందుకు దిగుమతి చేసుకునే కొత్త ప్యాసింజర్ వాహనాలకు ఈ నిబంధనలు వర్తిస్తాయి.

కొత్త నిబంధనల్లో విద్యుత్, హైబ్రిడ్, ప్రత్యామ్నాయ ఇంధన వాహనాలకు అదనపు వెసులుబాట్లు కల్పించారు. బ్యాటరీ ఆధారిత విద్యుత్ వాహనాలకు మూడు రెట్ల పరిమాణ ప్రోత్సాహక క్రెడిట్ లభించనుంది. ఇంధన ఆదా సాంకేతికతలు, ప్రత్యామ్నాయ ఇంధనాల వినియోగాన్ని కూడా కేఫ్‌-3 నిబంధనలు ప్రోత్సహిస్తున్నాయి.