అడ్వాన్స్‌ ట్యాక్స్‌ చెల్లింపులతో పెరిగిన వసూళ్లు

కార్పొరేట్‌ సంస్థల నుంచి అడ్వాన్స్‌ ట్యాక్స్‌ చెల్లింపులు మెరుగుపడటంతో ప్రస్తుత ఆర్థిక సంవత్సరంలో ప్రత్యక్ష పన్ను వసూళ్లు గణనీయంగా పెరిగాయి. సెప్టెంబర్‌ 17 నాటికి నికర ప్రత్యక్ష పన్ను వసూళ్లు రూ.12.12 లక్షల కోట్లకు చేరుకున్నాయి. గతేడాది ఇదే కాలంతో పోలిస్తే ఇది సుమారు 13 శాతం అధికం. కేంద్ర ప్రత్యక్ష పన్నుల బోర్డు (సీబీడీటీ) గణాంకాల ప్రకారం అడ్వాన్స్‌ ట్యాక్స్‌ వసూళ్లు 16 శాతం పెరిగి రూ.5.22 లక్షల కోట్లకు చేరాయి. ఇందులో కార్పొరేట్‌ చెల్లింపులు 18 శాతం వృద్ధితో రూ.4.16 లక్షల కోట్లుగా, కార్పొరేట్‌యేతర చెల్లింపులు 9 శాతం వృద్ధితో రూ.1.06 లక్షల కోట్లుగా నమోదయ్యాయి. ఇదే సమయంలో రిఫండ్‌ల జారీ 29 శాతం పెరిగి రూ.2.20 లక్షల కోట్లకు చేరగా, స్థూల ప్రత్యక్ష పన్ను వసూళ్లు 15 శాతం వృద్ధితో రూ.14.32 లక్షల కోట్లుగా నమోదయ్యాయి.

ఏప్రిల్‌ 1 నుంచి సెప్టెంబర్‌ 17 మధ్య సెక్యూరిటీస్‌ లావాదేవీల పన్ను (ఎస్‌టీటీ) వసూళ్లు 53 శాతం పెరిగి రూ.40,214 కోట్లకు చేరాయి. అయితే ఈ పెరుగుదలకు ప్రధాన కారణం బడ్జెట్‌లో ఎస్‌టీటీ రేట్లను పెంచడమే తప్ప, లావాదేవీల టర్నోవర్‌ పెరగడం కాదని డెలాయిట్‌ ఇండియా భాగస్వామి రోహింటన్‌ సిద్వా పేర్కొన్నారు. కార్పొరేట్‌, అడ్వాన్స్‌ ట్యాక్స్‌ వసూళ్లు పెరగడం వ్యాపార కార్యకలాపాలు స్థిరంగా కొనసాగుతున్నాయనడానికి సంకేతమని ఏకేఎం గ్లోబల్‌ మేనేజింగ్‌ పార్ట్‌నర్‌ అమిత్‌ మహేశ్వరి తెలిపారు. గత ఆర్థిక సంవత్సరంలో రూ.23.40 లక్షల కోట్ల ప్రత్యక్ష పన్ను వసూళ్లు నమోదుకాగా, ప్రస్తుత ఆర్థిక సంవత్సరంలో రూ.26.97 లక్షల కోట్ల లక్ష్యాన్ని కేంద్రం నిర్దేశించుకుంది.