బాలీవుడ్‌లో దక్షిణాది నటులకు వివక్ష.. రెజీనా కసాండ్రా సంచలన వ్యాఖ్యలు!

నటి రెజీనా కసాండ్రా బాలీవుడ్ చిత్ర పరిశ్రమలో తనకు ఎదురైన అనుభవాలపై ఆసక్తికర వ్యాఖ్యలు చేశారు. ప్రముఖ నిర్మాత కరణ్ జోహార్‌కు చెందిన ధర్మ ప్రొడక్షన్స్ నిర్మించిన ‘కేసరి 2’ చిత్రంలో నటించినప్పటికీ, తనకు తగిన గుర్తింపు, ప్రాధాన్యత ఇవ్వలేదని ఆవేదన వ్యక్తం చేశారు. ఇటీవల ఓ ఇంటర్వ్యూలో నటి జాన్వీ కపూర్ దక్షిణాది చిత్ర పరిశ్రమలో తన అభిప్రాయాలను వెల్లడించేందుకు సరైన అవకాశం లభించలేదని చెప్పడంపై రెజీనా స్పందించారు. ‘కేసరి 2’లో అక్షయ్ కుమార్ భార్యగా కీలక పాత్ర పోషించినప్పటికీ, సినిమా ప్రచార కార్యక్రమాల్లో తనకు కనీస ప్రాధాన్యత ఇవ్వలేదని తెలిపారు. సినిమాలోని ఓ పాటలో మొదటి నుంచి చివరి వరకు తానే కనిపించినా, చిత్ర నిర్మాణ సంస్థ తనను సామాజిక మాధ్యమాల్లో కనీసం ప్రస్తావించలేదని పేర్కొన్నారు.

బాలీవుడ్‌లో దక్షిణాది నటుల పట్ల ప్రాంతీయ వివక్ష ఉంటుందని రెజీనా అభిప్రాయపడ్డారు. ఉత్తరాదికి వెళ్లినప్పుడు తనను కేవలం దక్షిణాది నటిగానే గుర్తిస్తారని, దాని వల్ల తగిన అవకాశాలు, ప్రాధాన్యత లభించడం లేదని అన్నారు. తనకు తమిళం కంటే హిందీ భాష బాగా వచ్చినప్పటికీ ప్రాంతీయ గుర్తింపు ఆధారంగా వివక్ష ఎదుర్కోవాల్సి వస్తోందని ఆవేదన వ్యక్తం చేశారు. సినిమా పరిశ్రమలో మహిళా నటులు తమకు ఎదురవుతున్న సమస్యల గురించి ధైర్యంగా మాట్లాడాలని సూచించారు. అయితే, ఈ అంశాన్ని ఉత్తరాది, దక్షిణాది మధ్య విభేదాలుగా చూడకూడదని, అలా చేస్తే పరిశ్రమలో ప్రాంతీయ విభేదాలు మరింత పెరుగుతాయని అభిప్రాయపడ్డారు. జాన్వీ కపూర్, రాధిక ఆప్టే వంటి నటీమణులు తమ అనుభవాలను బయటపెట్టడాన్ని అర్థం చేసుకోగలనని రెజీనా పేర్కొన్నారు.