పవన్ కల్యాణ్‌తో విడాకులపై రేణు దేశాయ్ ఆసక్తికర వ్యాఖ్యలు!

నటి రేణు దేశాయ్ మరోసారి తన వ్యాఖ్యలతో వార్తల్లో నిలిచారు. పవన్ కల్యాణ్‌తో విడాకులు తీసుకుని 14 ఏళ్లు గడిచినా, తనకంటూ ప్రత్యేక గుర్తింపు ఇవ్వకుండా ఇప్పటికీ ఆయన మాజీ భార్యగానే చూస్తున్నారంటూ ఆమె ఆవేదన వ్యక్తం చేశారు. ఓ ఇంటర్వ్యూలో తన వ్యక్తిగత జీవితం, ఎదుర్కొంటున్న విమర్శలు, సామాజిక మాధ్యమాల్లో ట్రోలింగ్‌పై స్పందించారు. ‘బద్రి’ సినిమాతోనే తన జీవితం ప్రారంభమైందని చాలామంది భావిస్తున్నారని, అంతకుముందు తనకంటూ ఓ జీవితం లేదన్నట్లు చూస్తున్నారని అన్నారు. విడాకులై 14 ఏళ్లు గడిచాయని గుర్తుచేస్తూ.. శ్రీరాముడు కూడా 14 ఏళ్లే వనవాసం చేశారని, మరి తన వనవాసం ఎప్పుడు ముగుస్తుందని ప్రశ్నించారు.

విడాకుల తర్వాత తాను సాధించిన విజయాలను కూడా రేణు దేశాయ్ ప్రస్తావించారు. 2012లో విడాకులు మంజూరైన తర్వాత ఓ మరాఠీ సినిమాను నిర్మించానని, అది విజయవంతమైందని తెలిపారు. మరో సినిమాకు కథ రాయడంతో పాటు నిర్మాణం, దర్శకత్వ బాధ్యతలు కూడా చేపట్టానని చెప్పారు. డ్యాన్స్ షోలకు పనిచేశానని, కవితలు రాశానని, ప్రస్తుతం సినిమాల్లోనూ నటిస్తున్నానని వివరించారు. తనకంటూ ప్రత్యేక గుర్తింపు లేకపోతే ఈ అవకాశాలు ఎలా వస్తాయని ప్రశ్నించారు. కుక్కను కాపాడినా విమర్శలు ఎదుర్కోవాల్సి వస్తోందని, పవన్ కల్యాణ్ లేకపోతే తనకు జీవించే అర్హతే లేదన్నట్లుగా కొందరు మాట్లాడుతున్నారని ఆవేదన వ్యక్తం చేశారు. ప్రస్తుతం ఆమె వ్యాఖ్యలు చర్చనీయాంశంగా మారాయి.