ఎస్‌బీఐ కార్డు కొత్త సేవలు.. ఎఫ్‌డీ ఆధారిత సెక్యూర్డ్‌ క్రెడిట్‌ కార్డులు..

ఎస్‌బీఐ కార్డు ఎఫ్‌డీ ఆధారిత సెక్యూర్డ్‌ క్రెడిట్‌ కార్డులను అందుబాటులోకి తీసుకొచ్చింది. యోనో ప్లాట్‌ఫామ్‌ ద్వారా డిజిటల్‌ విధానంలో దరఖాస్తు చేసుకునే సదుపాయాన్ని కల్పించినట్లు సంస్థ తెలిపింది. పేపర్‌వర్క్‌ లేకుండా ప్రక్రియను పూర్తి చేసేలా ఈ సేవను రూపొందించారు. క్రెడిట్‌ హిస్టరీ లేని వారు లేదా తమ క్రెడిట్‌ ప్రొఫైల్‌ను మెరుగుపరుచుకోవాలనుకునే వారికి ఇలాంటి కార్డులు ఉపయోగపడే అవకాశం ఉంది. అయితే కార్డు జారీ సంస్థ నిబంధనలు, అర్హత ప్రమాణాలు వర్తిస్తాయి.

ఎస్‌బీఐ కార్డు ఎలైట్‌, ఎస్‌బీఐ కార్డు ప్రైమ్‌, సింప్లీక్లిక్‌ ఎస్‌బీఐ కార్డు, సింప్లీసేవ్‌ ఎస్‌బీఐ కార్డుల్లో ఎంపిక చేసుకునే అవకాశం ఉన్నట్లు సమాచారం. సెక్యూర్డ్‌ క్రెడిట్‌ కార్డుకు అనుసంధానమైన ఎఫ్‌డీ క్రెడిట్‌కు భద్రతగా ఉంటుంది. సాధారణ అన్‌సెక్యూర్డ్‌ క్రెడిట్‌ కార్డులకు ఇలాంటి సెక్యూరిటీ డిపాజిట్‌ అవసరం ఉండదు. వాటి జారీ సమయంలో క్రెడిట్‌ ప్రొఫైల్‌, ఆదాయం వంటి అంశాలను సాధారణంగా పరిగణనలోకి తీసుకుంటారు.