దేశ ఆర్థిక వ్యవస్థకు రక్షణ కవచం.. ఒడిశాలో ఆర్‌బీఐ మెగా ప్రాజెక్ట్

దేశ ఆర్థిక వ్యవస్థకు సంబంధించిన కీలక డేటాను భద్రపరచడం, ప్రధాన బ్యాంకింగ్‌ వ్యవస్థల నిరంతర కొనసాగింపును నిర్ధారించడం లక్ష్యంగా రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) ఒడిశాలో అత్యాధునిక హై-సెక్యూరిటీ డేటా సెంటర్‌ను నిర్మించింది. వ్యూహాత్మకంగా సురక్షిత ప్రాంతాన్ని ఎంపిక చేసి, భూకంప ప్రభావం తక్కువగా ఉండే ప్రాంతంలో ఈ కేంద్రాన్ని ఏర్పాటు చేసినట్లు సమాచారం. అంతర్జాతీయ ప్రమాణాలకు అనుగుణంగా టైర్-4 సర్టిఫికేషన్ డిజైన్‌తో దీనిని రూపకల్పన చేసినట్లు అధికారులు పేర్కొన్నారు.

దేశ పశ్చిమ, ఉత్తర సరిహద్దులకు దూరంగా ఉన్న ఈ ప్రదేశం మిస్సైల్ లేదా డ్రోన్ దాడుల ప్రమాదం తక్కువగా ఉండే ప్రాంతంగా భావించబడుతోంది. ఇది ఆర్‌బీఐకి రెండో డేటా సెంటర్ కాగా, ప్రాథమిక డేటా సెంటర్ ఖార్ఘర్‌ (నవీ ముంబయి)లో ఇప్పటికే కార్యకలాపాలు నిర్వహిస్తోంది.

కొత్త డేటా సెంటర్‌ను కరెన్సీ నిర్వహణ, చెల్లింపులు-పరిష్కార వ్యవస్థలు, నియంత్రణ డేటా ప్రాసెసింగ్ వంటి కీలక కార్యకలాపాలకు మద్దతు ఇచ్చే ప్రధాన కంప్యూటింగ్ మౌలిక వసతులతో రూపొందించారు. 2023లో ఒడిశాలోని ఇన్ఫో వ్యాలీ-2లో 18.55 ఎకరాల విస్తీర్ణంలో ఈ ప్రాజెక్టు ప్రారంభమైనప్పుడు ప్రదేశ ఎంపికపై అనేక సందేహాలు వ్యక్తమయ్యాయి. అయితే రవాణా లేదా సాధారణ కార్యకలాపాల కంటే వ్యూహాత్మక భద్రతా అంశాలకే అధిక ప్రాధాన్యం ఇచ్చినట్లు తెలుస్తోంది.