పిల్లల పెంపకంలో తల్లిదండ్రులు పాటించాల్సిన 10 సూత్రాలు...

పిల్లల పెంపకం అంటే వారిని ప్రతి సమస్య నుంచి కాపాడటం మాత్రమే కాదు.. జీవితంలో ఎదురయ్యే సవాళ్లను ఆత్మవిశ్వాసం, దయ, పట్టుదలతో ఎదుర్కొనేలా సిద్ధం చేయడం కూడా. భయమే లేకపోవడం ధైర్యం కాదని, భయంగా అనిపించినా సరైన పని చేయడమే నిజమైన ధైర్యమని తల్లిదండ్రులు పిల్లలకు వివరించాలి. వయసుకు తగిన బాధ్యతలను అప్పగించడం ద్వారా వారిలో ఆత్మవిశ్వాసం, బాధ్యతాయుతమైన ఆలోచన పెరుగుతాయి. స్కూలు బ్యాగ్ సర్దుకోవడం, తమ గదిని శుభ్రంగా ఉంచుకోవడం, ఇంట్లో చిన్న పనుల్లో సహాయం చేయడం వంటి బాధ్యతలు ఇందుకు ఉపయోగపడతాయి. అలాగే పిల్లలు ఎదుర్కొనే ప్రతి సమస్యను తల్లిదండ్రులే పరిష్కరించకుండా.. పరిస్థితులను అర్థం చేసుకుని పరిష్కారాలను అన్వేషించేలా ప్రోత్సహించాలి. తప్పులు, ఎదురుదెబ్బలు సహజమేనని వారికి అర్థమయ్యేలా చేసి.. వాటి నుంచి నేర్చుకునే అవకాశం ఇవ్వాలి.

పిల్లలు సాధించిన ఫలితాలను మాత్రమే కాకుండా.. వారు చేసిన ప్రయత్నం, పట్టుదల, నిజాయతీ, నిబద్ధత వంటి లక్షణాలను కూడా తల్లిదండ్రులు ప్రశంసించాలి. తమ అభిప్రాయాలను స్పష్టంగా వ్యక్తపరచడం, సహేతుకంగా ప్రశ్నించడం, తప్పు అనిపించినప్పుడు ధైర్యంగా ‘నో’ చెప్పడం కూడా నేర్పాలి. ఓటమి, నిరాశ, అసహనం, విసుగు వంటి భావోద్వేగాలను ప్రతి సందర్భంలోనూ తల్లిదండ్రులు తొలగించేందుకు ప్రయత్నించకూడదు. ఇలాంటి అనుభవాలే పిల్లల్లో భావోద్వేగ బలాన్ని పెంచుతాయి. ఇతరులకు అన్యాయం జరిగినప్పుడు వారికి అండగా నిలవడం, బలహీనులను గౌరవించడం వంటి విలువలను నేర్పాలి. వయసు పెరిగే కొద్దీ స్వీయ నిర్ణయాలు తీసుకునే స్వేచ్ఛ ఇవ్వడంతో పాటు.. భద్రత, నైతికత, బాధ్యత విషయంలో స్పష్టమైన హద్దులు ఏర్పాటు చేయాలి. అన్నింటికంటే ముఖ్యంగా పిల్లలు తల్లిదండ్రుల మాటల కంటే వారి ప్రవర్తనను ఎక్కువగా గమనిస్తారు. అందుకే ధైర్యం, సహనం, దయ, బాధ్యత వంటి విలువలను తల్లిదండ్రులు తమ ప్రవర్తనలో చూపిస్తే.. పిల్లలు కూడా వాటిని సహజంగా అలవర్చుకుంటారు.