జర్మనీలో కలకలం.. 16 ఏళ్ల బాలికను అసభ్యంగా తాకినట్లు రోబోపై ఆరోపణలు

జర్మనీలోని కొలోన్ నగరంలో ఓ రోబో అనుచితంగా ప్రవర్తించినట్లు వచ్చిన ఆరోపణలు కలకలం రేపాయి. గత వారాంతంలో వీధిలో నడుచుకుంటూ వెళ్తున్న మహిళల వద్దకు రోబో వచ్చి వారిని ఆలింగనం చేసుకునేందుకు ప్రయత్నించిందని, 16 ఏళ్ల బాలికను అసభ్యంగా తాకిందని సమాచారం. ఈ ఘటనను ఇద్దరు టీనేజీ యువకులు సోషల్ మీడియాలో లైవ్‌ ప్రసారం చేసినట్లు తెలుస్తోంది. రోబో యజమానిగా భావిస్తున్న 16 ఏళ్ల బాలుడు, అతడి స్నేహితుడు ఉద్దేశపూర్వకంగా దాన్ని నియంత్రించి ఉండవచ్చని పోలీసులు అనుమానిస్తున్నారు.

ఈ ఘటనపై దర్యాప్తు చేపట్టిన పోలీసులు రోబోతో పాటు యువకుల సెల్‌ఫోన్లను స్వాధీనం చేసుకున్నారు. రోబో కదలికలను ముందుగానే ప్రోగ్రామ్ చేశారా? లేక ఘటన జరిగిన సమయంలో యువకులు దాన్ని నియంత్రించారా? అనే అంశాలను పరిశీలిస్తున్నారు. ఈ తరహా ఘటన తమకు కొత్త అని పోలీసు ప్రతినిధి పేర్కొన్నట్లు సమాచారం. ఘటనకు సంబంధించిన వీడియోను సోషల్ మీడియాలో పోస్టు చేసిన వారిపై కఠిన చర్యలు తీసుకుంటామని పోలీసులు హెచ్చరించారు. అయితే, ఘటనకు సంబంధించిన పూర్తి వివరాలు దర్యాప్తులో వెల్లడికావాల్సి ఉంది.