వ్యక్తిగత ఫొటోలు, వీడియోల వైరల్‌పై సురేఖా వాణి ఆగ్రహం..

టాలీవుడ్ నటి సురేఖా వాణి వ్యక్తిగత జీవితానికి సంబంధించిన ఓ వీడియో సోషల్ మీడియాలో వైరల్ కావడం చర్చనీయాంశంగా మారింది. దీనిపై ఆమె తీవ్రంగా స్పందించారు. తన ఇన్‌స్టాగ్రామ్ ఖాతా హ్యాక్ అయిందని, తన అనుమతి లేకుండా కొందరు వ్యక్తిగత ఫొటోలు, వీడియోలను సోషల్ మీడియాలో షేర్ చేస్తున్నారని వెల్లడించారు. ఈ విషయంపై ఇన్‌స్టాగ్రామ్‌లో ఓ నోట్‌ ద్వారా తన ఆవేదనను వ్యక్తం చేశారు.

మీమ్ పేజీలు, మీడియా సంస్థలు, యూట్యూబ్ ఛానళ్లు, వ్యక్తులు ఎవరైనా సరే.. తన వ్యక్తిగత జీవితానికి సంబంధించిన కంటెంట్‌ను వెంటనే షేర్ చేయడం, రీపోస్ట్ చేయడం ఆపాలని సురేఖా వాణి విజ్ఞప్తి చేశారు. ఈ కంటెంట్‌ను ప్రచారం చేస్తున్న ఖాతాలు, వ్యక్తులను గుర్తించి ఆధారాలు సేకరిస్తానని, వారిపై చట్టపరమైన చర్యలు తీసుకుంటానని హెచ్చరించారు. వ్యూస్‌, రీచ్‌, పబ్లిసిటీ కోసం ఈ పరిస్థితిని ఉపయోగించుకోవద్దని కోరారు. తన వ్యక్తిగత గోప్యతను గౌరవించాలని స్పష్టం చేశారు. 2005లో సినీ రంగంలోకి అడుగుపెట్టిన సురేఖా వాణి.. ‘భద్ర’, ‘బొమ్మరిల్లు’, ‘ఏమాయ చేశావే’, ‘నాయక్’, ‘బాద్ షా’ వంటి చిత్రాలతో గుర్తింపు పొందారు.