పేద న్యాయ విద్యార్థులకు ఆర్థిక సాయం అందించాలి: సీజేఐ జస్టిస్ సూర్యకాంత్

ఆర్థిక ఇబ్బందుల కారణంగా ప్రతిభావంతులైన విద్యార్థులు న్యాయ విద్యకు, న్యాయవాద వృత్తికి దూరం కాకూడదని భారత ప్రధాన న్యాయమూర్తి (సీజేఐ) జస్టిస్ సూర్యకాంత్ పిలుపునిచ్చారు. న్యాయ విద్య అభ్యసించే సమయంలోనే కాకుండా, ప్రాక్టీస్ ప్రారంభించిన తొలి మూడు నుంచి ఐదేళ్ల వరకు కూడా యువ న్యాయవాదులకు ఆర్థిక సహాయం అందించాలని ఆయన సూచించారు. కెరీర్ ప్రారంభంలో లభించే ఈ మద్దతు వారికి వృత్తిపరంగా నిలదొక్కుకునేందుకు, తమకంటూ ప్రత్యేక గుర్తింపు తెచ్చుకునేందుకు దోహదపడుతుందని పేర్కొన్నారు.

అలాగే, జూనియర్ న్యాయవాదుల కెరీర్‌లో సీనియర్ న్యాయవాదుల మార్గదర్శకత్వం కీలక పాత్ర పోషిస్తుందని జస్టిస్ సూర్యకాంత్ అన్నారు. సీనియర్ల ప్రోత్సాహం, సూచనలు యువ న్యాయవాదుల భవిష్యత్తును తీర్చిదిద్దగలవని వివరించారు. ముఖ్యంగా జిల్లా కోర్టుల్లో ప్రజలకు మెరుగైన న్యాయ సహాయం అందించడంలో యువ న్యాయవాదుల పాత్ర ఎంతో ముఖ్యమని ఆయన గుర్తుచేశారు.