హెచ్‌-1బీ ఆశావహులకు ట్రంప్‌ సర్కారు మరో షాక్‌

అమెరికాలో ఉద్యోగం చేయాలని భావిస్తున్న హెచ్‌-1బీ వీసా ఆశావహులకు ట్రంప్‌ ప్రభుత్వం మరో షాక్‌ ఇచ్చింది. హెచ్‌-1బీ వీసా దరఖాస్తులపై అదనంగా 1,03,265 డాలర్ల ఫీజు విధించే ప్రతిపాదనను సోమవారం తీసుకొచ్చింది. హెచ్‌-1బీ వీసా క్యాప్‌ పరిధిలోకి వచ్చే దరఖాస్తులన్నింటికీ ఈ రుసుము వర్తిస్తుందని అమెరికా డిపార్ట్‌మెంట్‌ ఆఫ్‌ హోంలాండ్‌ సెక్యూరిటీ (డీహెచ్‌ఎస్) తెలిపింది. అయితే క్యాప్‌ మినహాయింపు ఉన్న దరఖాస్తులకు ఇది వర్తించదని స్పష్టం చేసింది. ప్రస్తుతం ఉన్న దరఖాస్తు రుసుములకు అదనంగా ఈ మొత్తాన్ని వసూలు చేయాలని ప్రతిపాదించారు. ఈ అంశంపై ఫెడరల్‌ రిజిస్టర్‌లో నోట్‌ ప్రచురించి, ప్రజల నుంచి అభిప్రాయాలను స్వీకరించనున్నారు. ఈ ఏడాది చివరికల్లా కొత్త రుసుమును అమల్లోకి తీసుకురావాలని ప్రభుత్వం భావిస్తున్నట్లు సమాచారం.

ప్రస్తుతం అమెరికా కాంగ్రెస్‌ ప్రతి ఏడాది 65 వేల హెచ్‌-1బీ వీసాలకు రెగ్యులర్‌ క్యాప్‌ విధించింది. అమెరికా విశ్వవిద్యాలయాల నుంచి మాస్టర్స్‌ లేదా అంతకంటే ఉన్నత డిగ్రీ పొందిన వారికి అదనంగా 20 వేల వీసాలను కేటాయిస్తున్నారు. కొత్త ఫీజు ప్రతిపాదన అమల్లోకి వస్తే అమెరికాలో ఉద్యోగ అవకాశాలు కోరుకునే భారతీయ నిపుణులు, విద్యార్థులపై గణనీయమైన ఆర్థిక భారం పడే అవకాశం ఉంది. 2024 ఆర్థిక సంవత్సరంలో ఆమోదమైన హెచ్‌-1బీ పిటిషన్లలో 71 శాతం భారతీయులవేనని నివేదికలు పేర్కొంటున్నాయి. ఇదే సమయంలో ఎఫ్‌-1 విద్యార్థి వీసాతో అమెరికాకు వెళ్లే వారికి అందుబాటులో ఉన్న ఓపీటీ కార్యక్రమంపైనా భారీ రుసుము విధించే యోచనలో ప్రభుత్వం ఉందని ఇమ్మిగ్రేషన్‌ న్యాయ సంస్థ ఫ్రాగొమెన్‌ పేర్కొంది.