‘డాల్ఫిన్ మైన్’ మళ్లీ ఎందుకు తెరుస్తున్నారు?

ప్రపంచవ్యాప్తంగా పెరుగుతున్న యుద్ధాలు, వ్యూహాత్మక ఖనిజాల కోసం సాగుతున్న పోటీ నేపథ్యంలో ఆస్ట్రేలియాలోని కింగ్‌ ఐలాండ్‌లో ఉన్న ‘డాల్ఫిన్‌ మైన్‌’ మళ్లీ వార్తల్లోకి వచ్చింది. ప్రపంచంలోని ప్రముఖ, లోతైన టంగ్‌స్టన్‌ గనుల్లో ఒకటిగా పేరున్న ఈ గనిలో దశాబ్దాలుగా పరిమితంగా ఉన్న కార్యకలాపాలు తాజాగా మళ్లీ ఊపందుకుంటున్నాయి. 1917లో తొలి ప్రపంచ యుద్ధం సమయంలో టంగ్‌స్టన్‌కు పెరిగిన డిమాండ్‌ కారణంగా ఈ గనిని తొలిసారి ప్రారంభించారు. రెండో ప్రపంచ యుద్ధానికి ముందు 1938లో మళ్లీ కార్యకలాపాలు ప్రారంభమయ్యాయి. కొరియా, వియత్నాం యుద్ధాల సమయంలోనూ గనిలో తవ్వకాలు కొనసాగాయి. ప్రచ్ఛన్న యుద్ధం ముగింపు దశలో, 1980ల చివర్లో గని కార్యకలాపాలు నిలిచిపోయాయి.

టంగ్‌స్టన్‌ అత్యంత దృఢత్వం, అధిక ద్రవీభవన స్థానం కారణంగా రక్షణ రంగంలో కీలకమైన లోహంగా పరిగణించబడుతోంది. సైనిక వాహనాల కవచాలు, కవచ ఛేదక ఆయుధాల భాగాలు, క్షిపణులు, రాకెట్‌ నాజిల్స్‌, రేడియేషన్‌ షీల్డింగ్‌, హైస్పీడ్‌ కటింగ్‌ టూల్స్‌ వంటి అనేక రంగాల్లో దీనిని ఉపయోగిస్తున్నారు. ప్రపంచంలో టంగ్‌స్టన్‌ ఉత్పత్తిలో చైనా ఆధిపత్యం కొనసాగుతుండగా, అమెరికా సహా పలు దేశాలు ప్రత్యామ్నాయ సరఫరా వనరుల కోసం ప్రయత్నిస్తున్నాయి. ఈ నేపథ్యంలో డాల్ఫిన్‌ మైన్‌లో కార్యకలాపాల పునరుద్ధరణ వ్యూహాత్మక ఖనిజాల సరఫరా, ప్రపంచ మార్కెట్‌పై ప్రభావం చూపే అంశంగా మారింది.